2017 жылда туугъан жашчыкъланы араларында футболдан турнир бардырылгъанды. Ол эришиуле Владикавказда «Алания» футбол академияны стадионунда ётгендиле. 
Эришиулеге «Спартак-Нальчик», «Спартак-Пятигорск», «Спартак-Алания», «Юность-Владикавказ», Юг Осетияны «Аланы», «Барсы» командала къатышхандыла.
Жаш спортчула эки къауумгъа юлешинип, алай эришгендиле. Бизникиле, кеслери къауумларында биринчиле болуп, жарым финалгъа чыкъгъандыла. Финалда уа «Юность-Владикавказ» команда бла тюбешгендиле.
Къонакъла экинчи жерни алгъандыла, кубок, майдалла къоллу да болгъандыла. Чабыууллукъда бек иги ойнагъан футболчугъа нальчикчи Аслан Аджиев саналгъанды. Командалары алчы жерге чыгъар ючюн, таулу жашла Ёзденланы Абдуллах бла Хуболланы Марат да къошумчулукъ этгендиле.  Жашла спортну бу тюрлюсю бла кюрешип башлагъанлы эки жыл болады. Спортчуланы тренерлери Даниил Туменко уа сохталары ариу футбол ойнагъанларын чертип айтханды. Футболчуланы футбол академияны директору, Шимал Осетия Республиканы «Алания» командасыны ветеранлары да кубокла, майдалла берип алгъышлагъандыла. 

Суратны Мамайланы Алий алгъанды.