КъБР-м и Iэтащхьэ КIуэ­кIуэ Казбек Къэрал Думэм и депутатхэу Геккиев Заур, Родинэ Викторие, Щхьэгуэш Адэлбий сымэ и гъусэу лэжьыгъэ IуэхукIэ щыIащ Бахъсэн къалэ округым.

ЗэIущIэм щытепсэлъы­хьащ зи чэзу Iуэху куэдым - псэупIэ-коммунальнэ IэнатIэм, кIэрыхубжьэрыху бы­дэхэр зэщIэкъуэным, гъуэгу­хэр зэгъэпэщыжыным, узын-­­
шагъэр хъумэнымкIэ, егъэ­джэныгъэ, спортымрэ щэнхабзэмрэ я IуэхущIапIэхэм я лэжьыгъэр къызэрызэгъэпэщам. Апхуэдэу ахэр щы­гъуазэ ящIащ округым щызэфIаха лэжьыгъэхэм, мы зэманым зи ужь итхэм.
«Унагъуэ» лъэпкъ проектым зэрыхэтым и фIыгъэкIэ иджыпсту Бахъсэн къалэм и хьэблэщIэм сабии 140-рэ зыщIэхуэну сад щаухуэ. Ар пэгъунэгъущ Гагарин Юрэ и цIэр зезыхьэ курыт школыщIэ №12-м икIи къатитIу зэтету щытынущ, метр зэбгъузэнатIэ 2000 иубыду. Ухуэныгъэхэр дызыхуэкIуэ илъэсым и кIэм зэфIагъэкIыну я мурадщ.
Курыт еджапIэ №5-м и къудамэхэм ящыщ зы къызыхуэ­тыншэу зэрагъэпэщыж «ЩIалэгъуалэмрэ сабийхэмрэ» лъэпкъ проектым ипкъ иткIэ. Абы щадолажьэ ныбжьыщIэ 204-м. Нэхъ пасэу зэрагъэ­пэщыжащ еджапIи 6.
Бахъсэн къалэм ЩэнхабзэмкIэ и уардэунэмрэ Дыгулыбгъуей къуажэм КIуэкIуэ В. М. и цIэр зэрихьэу дэт ЩэнхабзэмкIэ унэмрэ «Унагъуэ» лъэпкъ проектым ипкъ иткIэ къыщызэрагъэпэщащ сабийхэм папщIэ щэнхабзэ-узэ­щIакIуэ центрхэр. Дыгулыб­гъуей зыхуей щыхуагъэзащ Щэнхабзэм и уардэунэмрэ поликлиникэмрэ.
Бахъсэн яужь щихьащ сабий поликлиникэр къэгъэ­щIэрэщIэжыным. Унэр 1964 гъэм яухуауэ щытащ икIи жы­лэдэсхэм я узыншагъэр ­хъу­мэнымкIэ къалэным 2009 гъэ лъандэрэ къыхуагъэ­сэ­бэп. Проектым къызэры­щы­гъэ­лъэгъуамкIэ, абы къыпа­щIы­хьынущ фильтр-бокс, пэш­хэр щIэрыщIэу зэпраху­лыкIынущ, коммуникацэхэр зэрыщыту щызэрахъуэкIынущ. Ухуэныгъэр 2028 гъэм ятыну яубзыхуащ.
Нэхъ пасэу лэжьыгъэшхуэ щрагъэкIуэкIащ балигъхэм папщIэ щIыналъэ поликлиникэм, узыфэр къызэрахутэ иджырей Iэмэпсымэ лъэщ­хэ­ри щIагъэуващ. Абы зы лэ­жьэгъуэ махуэм цIыху ­750-м я узыншагъэм щыкIэлъы­плъыфынущ, гъуэлъыпIэ 40 щIэхуэу, цIыхухэм махуэм щеIэзэу къудамэ хэхаи яIэщ.
ЗэIущIэм къызэрыщыхагъэщамкIэ, абыхэм къадэ­кIуэу жылагъуэ зэхуэсыпIэхэми фэ­тэр куэду зэхэт унэхэм я пщIантIэхэми йолэжь, ­гъуэгухэр зэ­рагъэпэщыж. Коммунальнэ Iэ­натIэм и лэ­жьэкIэр ирагъэ­фIакIуэ «ГъащIэм хуэ­щIа инфра­структу­рэ» лъэпкъ проектым хыхьэу. Мы илъэ­сым зи ужь итынухэм ящыщщ Победэ, Шэрджэс, Хъураным и цIэр зезыхьэ, Шапсыгъ уэрам­хэр къызэ­щIэзыубыдэ, кило­мет­ри 5,5-м щIигъу зи кIы­хьагъ псы кIуа­пIэр зэгъэ­пэщы­жыныр. Абы ипэ къихуэу Дыгулыбгъуей къуажэм къы­ща­гъэщIэрэщIэжащ коммуникацэ километри 4,2-рэ.
Республикэм и Iэтащхьэми абы щIыгъуа къулыкъущIэхэми Бахъсэн къалэ округым щыпсэухэм я гуныкъуэгъуэ­хэм щыгъуазэ защIащ икIи зэ­рызыкъыхуагъэза жэрдэм­хэм елэжьыну къагъэгугъащ.

КъБР-м и Iэтащхьэмрэ Правительствэмрэ я пресс-IуэхущIапIэ.