Бахъсэн щIыналъэм хыхьэ Бахъсэнёнкэ къуажэм дэт ЩэнхабзэмкIэ унэм щекIуэкIащ Терроризмэм пэщIэтхэм я зэкъуэтыныгъэм и махуэм хуэгъэпса фэеплъ зэхыхьэ. Абы ягу къыщагъэкIыжащ хабзэхъумэ IэнатIэхэм щылажьэу е цIыху къызэрыгуэкIыу щIэпхъаджащIэхэм яIэщIэкIуэдахэр.
Зэхыхьэм хэтащ Бахъсэн районым и администрацэм и лIыкIуэхэр, къуажэм дэт IуэхущIапIэхэм я унафэщIхэр, хабзэхъумэ IэнатIэхэм я ветеранхэр, хэкIуэдахэм я Iыхьлыхэмрэ благъэхэмрэ, школакIуэхэмрэ щIалэгъуалэмрэ.
ЗэIущIэм хэтахэр зы дакъикъэкIэ яхуэщыгъуащ лIыхъужьхэм. А махуэм зи цIэр фIыкIэ къраIуахэм, зи хахуагъэр щIалэгъуалэм щапхъэу хуагъэлъэгъуахэм ящыщщ ЛIыгъэм и орденым и нагъыщэ псори зыхуагъэфэща, милицэм и капитан Хьэндэхъу Заур, милицэм и подполковник, юридическэ щIэныгъэхэмкIэ кандидат Бичэ Джульбер, полицэм и капитан Асанов Аслъэн, КъБР-м и Суд Нэхъыщхьэм и лэжьакIуэ Сидакъ Азрэт-Алий, къэрал кIуэцI къулыкъум и лэжьакIуэхэу Жанджэрий Дусэ, Хьэндэхъу Заретэ, Сэбаншы Хьэсен сымэ.
КъекIуэлIахэм защыхуигъазэм, Бахъсэн районым и щIыпIэ администрацэм и Iэтащхьэм хабзэхъумэ IэнатIэхэм ядэлэжьэнымкIэ и къуэдзэ Тохъутэмыщ Мухьэмэд къыхигъэщхьэхукIащ:
- Терроризмэмрэ хабзэншагъэмрэ япэщIэтыным зи псэр щIэзыта ди лъахэгъухэм я фэеплъыр Бахъсэн щIыналъэм щыпсэу дэтхэнэми дежкIэ лъапIэщ. А щIалэхэр я псэ емыблэжу тхьэрыIуэм, къалэным, лъэпкъым, хэкум яхуэпэжащ. Дэ псоми ди пщэрылъщ дыпсэуху абыхэм я цIэхэр пщIэ пылъу къитIуэну, я фэеплъыр къытщIэхъуэ щIэблэм я деж нэтхьэсыну. Ди щIыналъэм мамыр гъащIэр щытхъумэфын, апхуэдэ гузэвэгъуэхэм зэи къытримыгъэзэжын щхьэкIэ зэкъуэтыныгъэм дыхуэсакъын, лIыхъужьыгъэ нахуэм и щапхъэхэмкIэ щIалэгъуалэр дгъэсэн хуейщ.
А пшыхьым щагъэлъэгъуащ Зэгъэщтокъуэ Людэ и усэхэм къытращIыкIа «Гъыбзэ» теплъэгъуэр, Бахъсэн районым и творческэ гупхэм лъэпкъ уэрэдхэр жаIащ.
ХэкIуэда ди лъахэгъухэм я фэеплъыр мыкIуэдыжыным, щIалэгъуалэр хэкупсэу гъэсэным хуэунэтIа Iуэхугъуэхэм хыхьэу футболымкIэ фэеплъ зэхьэзэхуэ зэрырагъэкIуэкIынур жаIащ къызэгъэпэщакIуэхэм. Районым и командиплIыр 2026 гъэм фокIадэм и 19-м сыхьэти 10-м щIидзэу Бахъсэнёнкэ къуажэм щызэдэджэгунущ.
Тхыгъэри сурэтри
ШэрIужь Даянэ ейщ.
