Велосипед спортчуланы «Шимал Кавказны халкъларыны шуёхлугъу» деген 34-кюнлюк эришиулерини 5-чи кезиую тюнене Нальчикде бардырылгъанды, 6-чысы уа бюгюн Прохладный шахарда ётерикди. Бу жумуш Россейни велосипед спортуну шёндю бола тургъан чемпионатына жораланады, аны Къабарты-Малкъарда эки кезиую уа спортну бу тюрлюсюнден СССР-ни, дунияны эмда олимпиаданы чемпиону Борис Шуховха эмда СССР-ни флотуну адмиралы Арсений Головко туугъанлы 120 жыл толгъанына аталгъандыла.

Нальчикде эришиуле Абхазия майданны къатында Ленин атлы проспектде башланнгандыла. Ары дери уа КъМР-ни спорт министрини орунбасары Заур Хежев, сахнагъа чыгъып, къонакълагъа, шахарчылагъа да салам бергенди. «Багъалы шуёхла! Къабарты-Малкъарны къонакъбайлы жеринде кезиуюгюз сизге байрамлы, жарыкъ, аламат болсун. РФ-ни халкъларыны бирлигини жылында – ол а быйылды – быллай жумушла арада мамырлыкъны эмда шуёхлукъну кючлендирирге себеплик этедиле. Барыгъызгъа да саулукъ эмда жетишимле тежейме», - дегенди ол.
Алгъышлау сёзлерин РФ-ни велоспорт федерациясыны башчысыны орунбасары Ренат Хамидулин эмда Россельхозбанкны республикада бёлюмюню келечиси да айтхандыла, ызы бла кюндюз ючню жарымында эришиуле башланнгандыла. Алагъа талай региондан келген 11 къауум чыгъып, шахарны ичинде бир ненча орам бла тёгерек айланып, майданнга алай къайтхандыла.
Ингирде уа спортчуланы эмда шахарчыланы майданда концерт сакълай эди. Анда, сора бюгюн Прохладныйде Ленин атлы майданда да Якутиядан келген Пётр Погодаев «Кино» рок-къауумну жырларын айтырыкъды.

Улбашланы Мурат.