Уста къоллула

Шабат кюн Нальчикде Правительствону юйюню аллында майданда «Россейни татыулары» деген фестиваль башланнган эди. Анда къыралыбызны кёп жерлеринден келечилери миллет ашарыкъларын кёргюзтгенди. 
Ашарыкъладан сора да, ары устала къол ишлерин да келтиргендиле. Агъач къашыкъладан башлап, жаухар минчакълагъа дери кёп зат бар эди. 
Алагъа къарай тургъанымлай кёрдюм таулу кишини, тиширыуну алгъын жюрютген кийимлерин. Сол жанында макет юсюнде кёксюлдюм тюрсюнлю чепкен, къаптал, жумушакъ къайиш бел бау, къара къама, онг жанында уа жап-жашил таулу жыйрыкъ, ариу нюр тёгюлгенча. 
Ол тийреге келген адамла алагъа къарап, сейир этедиле. Кёп къыйын салынып этилген кийимлени иеси уа Хасауланы Светланады. Анга Къараланы Люба болушады.
Кийимлени Светлана кеси тикгенди. Ол иш бла эрттеден бери кюрешеди. Юйде тигиу этген цехи барды, адамла келип, заказ этедиле. Кийимлени алгъандан сора, ишин жаратып, кёп алгъыш да айтып кетедиле. 
Светлана бизни миллет кийимлени Россей тийресинде бардырылгъан кёп тюрлю кёрмючледе кёргюзте турады. Алгъаракълада Дубайдан, ары дери уа Америкадан келген къонакъла да заказ этген эдиле анга. Таулу тиширыуну къол ызы къыралыбыздан тышында да белгили бола тебирегени да игиди. Алай айныйды адам эм аны иши.

Османланы Хыйса.

Поделиться:

ЧИТАТЬ ТАКЖЕ:

17.11.2026 - 09:42

Ана тиллеринде кюзню суратлагъандыла

Бюгюнлюкде Яникой элни сабий садында жашчыкъланы бла къызчыкъланы ана тилибизге юйретиуге аслам эс бёлюнеди.

17.11.2026 - 09:40

Таулагъа ёрлеу хатасыз болурча

«Къоркъуусуз туризм»  башламчылыкъны чегинде Чегем ауузунда Орус география биригиуню «Альтаир» жаш тёлю арасыны келечилерине таулагъа ёрлеуден жараула къуралгъандыла. 

17.11.2026 - 09:38

Бир бирни сыйын кёрюп

Не заманда да бир тюрлю бир иш бла кюрешген адам аны этгенине жамауат не багъа бергенине эс бургъанлай келеди.

16.11.2026 - 09:29

Бюджетге къошакъла, тюзетиуле да сюзюледиле

Къабарты-Малкъарны Парламентини комитетлерини жыйылыуларында «КъМР-ни 2027 жылда эм 2028-2029 план кезиуде бюджетини юсюнден» республикалы законну проекти сюзюлгенди.

16.11.2026 - 09:27

Акъ сёзю, жыры да жарытхандыла сахнаны

Алда билдиргенибизча, бу кюнледе республиканы окъуу юйлеринде, китапханалада да  Гыттыуланы  Максимни окъуулары барадыла.