КъБР-м и Iэтащхьэ КIуэкIуэ Казбек иригъэкIуэкIащ Къэбэрдей-Балъкъэр Республикэм Хабзэр къызэгъэпэщынымкIэ зэпымыууэ лажьэ и зэзыгъэуIу гупым и зэIущIэ. Зэхуэсым хэтащ КъБР-м и Парламентым и УнафэщI Егоровэ Татьянэ, КъБР-м щыIэ федеральнэ инспектор нэхъыщхьэ Васильченкэ Дмитрий, КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, КъБР-м и Правительствэм щыщхэр, щIыналъэ администрацэхэм я Iэтащхьэхэр, хабзэхъумэ, кIэлъыплъакIуэ, къарузехьэ IэнатIэхэм я лIыкIуэхэр.
Зэхуэсым щIидзэным ипэ къихуэу, КIуэкIуэ Казбек абы хэтхэм яригъэцIыхуащ КъБР-м СледствиемкIэ щыIэ управленэм и унафэщIым и къулыкъум аргуэру ягъэува Устэ Валерэ. Республикэм и Iэтащхьэм къыхигъэщащ абы и лэжьыгъэм фIыуэ зэрыхищIыкIыр икIи ар IэнатIэр егъэфIэкIуэным зэрыхуэщхьэпэнум шэч къызэрытримыхьэр.
Къэрал хабзэм тетыныр къызэгъэпэща зэрыхъум, Iулъхьэ зэIэпыхыным теухуа щIэпхъаджагъэхэм япэщIэтыным, ялэжьа апхуэдэ хабзэншагъэхэм кърикIуа мылъку хэщIыныгъэхэр егъэпшыныжыным и Iуэху зыIутым теухуауэ къэпсэлъащ республикэм и прокурор Хабаров Николайрэ КъБР-м и Iэтащхьэм и Администрацэм Коррупцэм пэщIэтыным ехьэлIа IуэхухэмкIэ и управленэм и унафэщI Тюбеев Амырхъанрэ.
Апхуэдэуи гулъытэ щхьэхуэ хуащIащ гъуэгухэм шынагъуэншагъэр къыщызэгъэпэщыным. Абы и лъэныкъуэкIэ зэфIагъэкIхэр зэпкърахыу къэпсэлъащ КъБР-м щыIэ МВД-м Гъуэгухэм шынагъуэншагъэр къыщызэгъэпэщынымкIэ и къэрал инспекцэм и управленэм и унафэщI Бэджыдэ Юрэрэ КъБР-м транспортымрэ гъуэгу хозяйствэмкIэ и министр ДыщэкI Аслъэнрэ.
КIуэкIуэ Казбек къыхигъэщхьэхукIащ гъуэгу-транспорт къэхъукъащIэхэм я бжыгъэр, абыхэм псэдзыгъэ къэзышэхэри яхэту, гъэмэщIэным хуэунэтIа лэжьыгъэр нэхъри егъэфIэкIуэн зэрыхуейр. Абы хуэгъэпсащ Урысей Федерацэм гъуэгухэм шынагъуэншагъэр къыщызэгъэпэщыным хуэунэтIауэ зэхалъхьа къалэн нэхъыщхьэхэри.
Зэрыщыту къапщтэмэ, лъэпкъ проектхэмрэ а унэтIыныгъэм теухуа программэхэмрэ Къэбэрдей-Балъкъэрым зэрыщагъэзащIэ лъандэрэ мардэхэм къитIасэу зыхуей хуагъэзащ къэрал мыхьэнэ зиIэ гъуэгухэм я процент 65-м щIигъур, щIыналъэ гъуэгухэм я процент 76-м нэхърэ нэхъыбэр. Лэжьыгъэшхуэ щокIукI Налшык къалэмрэ республикэм и щIыналъэхэмрэ. Абыхэм къадэкIуэу, рулым дэсхэмрэ лъэсрызекIуэхэмрэ гъуэгу хабзэхэм тетыным хуэущиинми мыхьэнэшхуэ иIэщ.
ЗэIущIэм щхьэхуэу и гугъу щащIащ «ГъащIэм хуэщIа инфраструктурэ», «Туризмэмрэ хьэщIэ егъэблэгъэкIэмрэ», «Фейдэ къызыпэкIуэ, нэгъуэщIхэм япеуэфын экономикэ» лъэпкъ проектхэр щагъэзащIэкIэ къэрал хабзэр къызэпамыудыным пыщIа къалэнхэм зэрапэлъэщми. Абыхэм ятеухуауэ зэхуэсым къыщыпсэлъащ КъБР-м ухуэныгъэмрэ псэупIэ-коммунальнэ хозяйствэмкIэ и министрым и къалэнхэр зыгъэзащIэ Журавлев Андрей, курортхэмрэ туризмэмкIэ министр Быф Аскэр, экономикэ зыужьыныгъэмкIэ министр Рахаев Борис.
