КъМР-ни Владимир Вороков атлы Маданият фондунда Россейни халкъларыны тиллерини кюнюню аллында «Ана тилим, жаным-тиним!» деген тюбешиу къуралгъанды.
Быйыл бу байрам биринчи кере белгиленеди эмда хар бирибизге да ана тилибизни магъаналылыгъын, тёлюлени байламлыкъларын, къыралыбызны халкъларыны маданият хазналарын сакълаугъа уллу жууаплылыкъны эсге салады. Ол кеси да Россейни Президенти Владимир Путинни башламчылыгъыды, энди Россейни халкъларыны тиллерини кюню сегизинчи сентябрьде, айтхылыкъ аварлы поэт Расул Гамзатовну туугъан кюнюнде, белгиленеди.
Маданият фондда болгъан тюбешиуню аны председатели Люаза Макоева къурагъанды, ачханды эм бардыргъанды.
– Тил, адет-тёреле, миллет кийимле – ала бары да миллетни маданиятын, энчилигин кёргюзтген шартладыла. Бу затла бир болуп, къайсы миллетни да бетин ачыкълайдыла. Россейде жюзле бла тилле эм диалектле хайырланыладыла. Аланы саны 277-ге жетеди, бир бирлерин а адамла орус тилни хайырындан ангылайдыла, - деп башлагъанды ол сёзюн, тюбешиуню ача. Андан сора да, ол ана тилни билиуню магъаналылыгъын чертип, ансыз миллет миллет болмагъанын да белгилегенди. «Ана тилин, адетин, тёресин билмеген адам жахилге саналады. Бек башы уа – ол башха миллетлени келечилерин да сюерик тюйюлдю. Алай эсе уа, аны не шуёху, не тенги, не жан жууукълукъ адамы да хазна боллукъ тюйюлдю. Ол шарт эм къыйынладан бириди адам улуну жашауунда»,- дегенди Люаза Макоева. Сёзюню ахырында уа ол жыйылгъан жаш адамланы ана тиллерин, ахшы адет-тёрелерин сюерге, билирге чакъыргъанды.
Андан сора концерт программа башланнганды. Ол малкъар, къабарты, орус тилледе жырланы айтыу бла ачылгъанды. Аланы уа КъМКъУ-ну педагогика, психология эм физкультура-спорт институтуну студентлери эшитдиргендиле. Дагъыда тюбешиуню кезиуюнде республикада миллет-маданият араланы башчылары да сёлешгендиле, аланы келечилери да ана тиллеринде жырла, назмула айтхандыла. Миллет, жырла, тепсеуле, той-оюн да элпек эдиле ингирни чегинде.
Студентле уа, кёпге дери жайылыргъа сюймегенлей, тюбешиуню хайырындан аслам хайырлы затны билгенлерин, кёргенлерин, тюбешиу а керти да сейирлик, жарыкъ да болгъанын белгилегендиле. Алай бла ана тиллени байрамы Маданият фондда кёп миллетлени келечилерин бирикдирип, эсде къалырча къууанч болгъанды.
Холаланы Марзият.
