Бу кюнледе «Экология болум» миллет проектни чеклеринде «Россейни суулары» деген акция бардырылгъанды. Ол черекни жагъаларын кир-кипчикден, къалгъан-къулгъанладан, чырпыладан тазалар мурат бла къуралгъанды. Кеси да КъМР-ни Табийгъат байлыкъла эмда экология министерствосуну, Хасанияны, Акъ-Сууну, Кенжени, Вольный Ауулну администрацияларыны, Терк къазакъланы арасыны, жамауат организацияланы эм блогерлени себепликлери бла ётгенди, деп билдириледи КъМР-ни Табийгъат байлыкъла эмда экология министерствосундан.
Акциягъа шахарны тазалыгъына уллу кёллю болмагъанла: ведомстволаны, жамауат биригиулени келечилери, студентле, волонтёрла, школчула да къошулгъандыла. Бек аздан, эки жюз адам къатышханды. Аны кезиуюнде Нальчик сууну жагъасыны 4,5 километр чакълы бирин пластикден, мияладан эм башха кир-кипчикден бла зыбыр къалгъан-къулгъанладан тазалагъандыла. Ахырында 35 машок багуш жыйылгъанды. Аланы кетерирге «Экотехпром» оператор болушханды.
КъМР-ни табийгъат байлыкъла эмда экология министри Шауаланы Илияс, быллай акцияны магъаналыгъыны юсюнден айта, черек жагъаланы тазалау жаны бла изеу онунчу кере бардырылгъанын эм жыл сайын анга кёп адам къошула баргъанын белгилегенди. Ол санда тыш регионладан къонакъла да келедиле.
- Бизни борчубуз экология жаны бла адеплиликни жаяргъады. Аны бла байламлы сабий садлада, школлада тюбешиуле бардырабыз, жамауатха аны магъанасын ангылатабыз. Быллай акциягъа къатышхан адам табийгъатха заран салмазлыгъы да баямды. Мен кесим Хасанияда Нальчик суудан узакъ болмай жашайма, аны себепли аны жагъалары кирсиз болсала, асыу кёрюнеди эм кёлюнг да кётюрюледи»,- дегенди Шауа улу.
Ахырында Россейни Табийгъат байлыкъла эмда экология министерствосуну аналитика арасыны таматасы Андрей Мацуров бла Шауаланы Илияс тёгерек-баш таза болуруна къыйын салгъанланы сыйлы грамотала эм дипломла бла саугъалагъандыла.
Саулай алып айтханда, «Россейни суулары» къудуретни, суу байлыгъыбызны сакълау бла чекленип къалмайды, жаш тёлюню экологиягъа сакъ болургъа юйретиуге да уллу къошумчулукъ этеди. Аны бла бирге акция хар адамгъа да кеси сюйген жерни тазаларгъа онг береди. Андан сора да, тёгерек айбат болгъанын, къыралны суу байлыгъын кёрюрге эм аны келир тёлюлеге сакъларгъа кереклисин жамауатха эсгертеди.
Эсге сала айтсакъ, Къабарты-Малкъарда «Россейни суулары» экология акция 2014 жылда апрельден башлап октябрьге дери ётеди. Быйыл аны чеклеринде 400 акция бардырылгъанды. Ол санда черек жагъаланы 1141,66 километри зыбыр къалгъан-къулгъанладан бла кир-кипчикден тазаланнгандыла. Акциягъа 240 мингден аслам адам къатышханды. Россей Федерацияны Табийгъат байлыкъла эмда экология министерствосу къурап, «Россейни суулары» деген битеуроссей акцияны эсеплерине жораланнган семинар ётгенди.
Магометланы
Сулейман.
