КъБР-м и Iэтащхьэ КIуэкIуэ Казбек хэтащ Адыгэ Республикэм и къалащхьэ Мей­къуапэ щызэхаша, тхакIуэ цIэрыIуэу, жылагъуэ лэжьакIуэ емызэшу щыта, Урысей Федерацэм ЛэжьыгъэмкIэ и ЛIыхъужь МэшбащIэ Исхьэкъ Шумахуэ и къуэр иужьрей ­гъуэгуанэм щытрагъэувэжа фэеплъ пэкIум. Ди республикэм и УнафэщIыр зи пашэ гупым хэтащ КъБР-м ЦIыхум и хуитыныгъэхэмкIэ и уполномоченнэ Зумакулов Борис, Дунейпсо Адыгэ Хасэм и Тхьэмадэ, УФ-м и Президентым и нэIэм щIэту лажьэ Лъэпкъ зэхущыты­кIэ­хэмкIэ Советым хэт Сэхъурокъуэ Хьэутий, КъБР-м и Парламентым и Уна­фэщIым и къуэдзэ Жанатаев Сэлим, КъБР-м  и Мус­лъымэнхэм я дин IуэхущIапIэм и ­пашэм и къуэдзэ Сыжажэ Алим сымэ.    

Фэеплъ пэкIум къыщыпсэлъащ КIуэкIуэ Казбек. Абы и псалъэм къыхигъэщащ лъэпкъ щэнхабзэр хъумэным МэшбащIэ Ис­хьэкъ  хэлъхьэныгъэ ин зэрыхуищIар, Къэбэрдей-Балъкъэрым щыпсэухэм я деж абы пщIэшхуэ къызэрыщилэжьар. 
- Исхьэкъ Шумахуэ и къуэр Хэкум и къуэ пэжу дунейм тетащ. УФ-м и Президент Путин Владимир къыхуигъэфэща къэрал дамыгъэ лъапIэри и щыхьэтщ абы, - жиIащ КIуэкIуэ Казбек. - Апхуэдэу хэкупсэу зи гъащIэр зы­хьа а цIыху щэджащэр зыщыщ адыгэ лъэпкъми и ­къуэ пэжт. Къэбэрдей-Балъкъэрым и цIыхубэм МэшбащIэм щIыхь хуащIу дапщэщи ­къекIуэкIащ. Ди республикэр щы­тыкIэ къызэрымыкIуэ щихуа лъэхъэнэми Исхьэкъ и псалъэ Iущым куэд щIэдэIуащ, пщIэ хуащIу. ХэкулIым и фэеплъыр игъащIэкIи ди гум щытхъу­мэнущ. Апхуэдэуи укъызыхэкIа лъэпкъыр, ущалъхуа щIыналъэр, Хэкур фIыуэ лъагъун, лъэпкъ щэн­хабзэр хъумэн зэрыхуейм и щапхъэу щIэб­лэхэм къахуэнэнущ МэшбащIэм и ­гъащIэмрэ и IуэхущIафэхэмрэ. 
КIуэкIуэ Казбек игуми и псэми къабгъэ­дэкIыу яхуэгузэващ дунейм ехыжам и Iыхь­лыхэмрэ благъэхэмрэ, МэшбащIэм и лIэныгъэр Къэбэрдей-Балъкъэрым и дежкIэ хэ­щIы­ныгъэшхуэу зэрыщытыр къыхигъэщу.