Къэбэрдей-Балъкъэрым и Къэралыгъуэм и махуэр Театр щхъуантIэм щагъэлъэпIащ «Гъагъэ, си щIыналъэ!» гуфIэгъуэ концерт инымкIэ.
Концертыр ирагъэжьащ усэрэ макъамэкIэ. Абы хыхьэу зыкъэзыгъэлъэгъуа артистхэм я фэилъхьэгъуэхэм хаухуэнат ди республикэр къызэрацIыху щIыналъэм и псыежэххэр, бгыщхьэ хужьхэр, уафэ къабзэр зи дамыгъэ хъуа лъэпкъ ныпым и плъыфэхэр.
Утыкум псалъэ гуапэхэр щыIурт, къэралым и нэгъуэщI щIыналъэхэми хуэдэу, зи бзэкIэ, щэнхабзэкIэ, зэрыт динкIэ зэщхьэщыкI лъэпкъ зэмылIэужьыгъуэхэм щыщхэр Къэбэрдей-Балъкъэрым зэгурыIуэрэ зэныбжьэгъугъэрэ яку дэлъу зэрыщыпсэур, зэрызэдэлажьэр.
Къэбэрдей-Балъкъэрым щыпсэухэм яхуэгъэза хъуэхъухэр экранымкIэ къатащ щIыналъэм исхэр зэрыгушхуэ спортсмен цIэрыIуэхэм, щIалэгъуалэ жыджэрхэм, дзэ Iуэху хэхам хэтхэм къабгъэдэкIыу.
Лъэпкъ фэилъхьэгъуэхэр къызыщыпс, республикэм и къэфакIуэ гупхэр утыкум нэхъри щызэкъуагъэуват «Псы», «Жьы», «ЩIы» къафэ теплъэгъуэхэм. КъБР-м и Музыкэ театрым и хорым и уэрэджыIакIуэхэм, ГъуазджэхэмкIэ Кавказ Ищхъэрэ къэрал институтым и студентхэм, ГъуазджэхэмкIэ школхэм я гъэсэнхэм зэдагъэзэщIащ «Родина» уэрэдыр. Iэгуауэ мыухыж хуаIэтащ «Къафэ»-р зыгъэзэщIа дызэрыгушхуэ, дуней псом къыщацIыхуа «Кабардинка» ансамблым.
Пшыхьыр ягъэдэхащ КъБР-м щIыхь зиIэ и артист, Москва щылажьэ Хардай Мухъутар, ди республикэм и уэрэджыIакIуэхэу Хьэжырокъуэ СулътIан, ДыщэкI Артур, Текуев Амур, Жаникаев Эльдар, Даут Сусанэ (Адыгэ Республикэ), Думэныщ Лианэ (Къэрэшей-Шэрджэс), Царикаевэ Аланэ (Осетие Ищхъэрэ-Алание), Ахмадовэ Хавэ (Шэшэн Республикэ), Ингушетием къикIахэу Алиевэ Айнэрэ уэрэдымрэ къафэмкIэ «Магас» къэрал ансамблымрэ, уэрэдымрэ къафэмкIэ «Тэрч къэзакъхэр» гупым, «Балкария», «Намыс», «Амра», «Эльбрус», «Нирвана» ансамблхэм.
Пшыхьыр зэхуащIыжащ хорым хэтхэмрэ концертыр зыгъэдэха уэрэджыIакIуэхэмрэ къэфакIуэхэмрэ зэдагъэзэщIа уэрэдымкIэ. Утыкум щыхъуэхъуащ республикэм мамырыгъэ, зыужьыныгъэ иIэну, ефIэкIуэну, лIэщIы-
гъуэкIэрэ лъэпкъхэм къадекIуэкI хабзэ дахэхэр яхъумэну.
«СигукIи си псэкIи къызбгъэдэкIыу фIыщIэ яхузощI ди къуэш щIыналъэхэм - Адыгэ, Дагъыстэн, Ингуш, Къэрэшей-Шэрджэс, Осетие Ищхъэрэ-Алание, Шэшэн республикэхэм - къикIыу Къэбэрдей-Балъкъэрым и артистхэм я гъусэу ди гуфIэгъуэр къыддэзыгъэдэха, КъБР-м и Къэралыгъуэм и махуэшхуэм теухуа концертыр гуапэу къыддэзыIыгъа уэрэджыIакIуэхэмрэ къэфакIуэхэмрэ. Махуэшхуэр къызэзыгъэпэщахэми фIыщIэ фхуэфащэщ. Ар къызэрывэхъулIам, щIыналъэм исхэмрэ ди хьэщIэхэмрэ я гукъыдэжым абы зэрыхигъэхъуам шэч хэлъкъым», - щитхащ КъБР-м и Iэтащхьэ КIуэкIуэ Казбек Максым щиIэ напэкIуэцIым.
ТЕКIУЖЬ Заретэ.
Сурэтхэр Къарей Элинэ трихащ.
