КъБР-м и Музыкэ къэрал театрым фокIадэм и 6-м щызэхуащIыжащ гъуаз­джэхэмкIэ «Кавказым - мамы­рыгъэ» XV лъэпкъхэм зэдай фес­тива­лыр. Абы хыхьэу Къэбэрдей-Балъкъэрым и щIыналъэ псоми «Зэныбжьэгъугъэм и концертхэр» щекIуэ­кIащ. Къэбэрдей-Балъкъэрым и Къэ­­ралыгъуэм и махуэм и щIыхькIэ зэхыхьэ гуапэхэр къызэрагъэпэщащ, УФ-м ЩэнхабзэмкIэ и министерст­вэмрэ «Росконцерт»-мрэ я дэIэпы­къуэгъуу.

Театрым и пэIущIэ пэшым щагъэ­лъэгъуащ цIыху IэпщIэлъапщIэхэм я IэрыкI телъыджэхэр. 
Фестивалым и художественнэ уна­фэщIыр лъэпкъхэм зэдай зэпеуэхэм я лау­реат, Осетие Ищхъэрэ - Алание Рес­пуб­ликэм цIыхубэ IэмэпсымэхэмкIэ Лъэпкъ къэрал оркестрым и дирижёр нэхъыщхьэ Кумаритов Тенгизщ.
Концертым хэтащ Урысейм и щIыналъэхэм, Кавказым щыпсэу лъэпкъхэм я уэрэджыIакIуэхэмрэ къэфакIуэхэм­рэ. Пшыхьыр ягъэдэхащ Осетие Ищ­хъэ­рэ-Алание Республикэм цIыхубэ Iэмэ­п­сы­мэхэмкIэ Лъэпкъ къэрал орке­стрым, «Кабардинка» къэрал академическэ къэ­факIуэ ансамблым, «Балкария» къэ­рал IуэрыIуатэ-этнографие къэфа­кIуэ ансамблым, «Россия» къэ­рал академическэ урыс цIыхубэ къэфакIуэ ансамбль Зыкинэ Людмилэ и цIэр зе­зыхьэм. 
ФокIадэм и 4 - 6 махуэхэм екIуэкIа мы­гъэ­рей фестивалым къали 5 (Мэхъэчкъалэ, Беслъэн, Грознэ, Владикавказ, Налшык) къызэщIиубыдащ. Хьэ­щIэхэм папщIэ мастер-классхэр, гъэлъэгъуэ­ны­гъэхэр, концертхэр къы­зэрагъэпэщащ. Абы хыхьэу зыхагъэ­гъуэзащ лъэпкъ зэмылIэужьыгъуэхэм къаде­кIуэкI хабзэхэмрэ щэнхабзэмрэ.
Фигу къэдгъэкIыжынщи, фестивалыр 1996 гъэ лъандэрэ йокIуэкI. Ар и жэрдэмщ УФ-м и цIыхубэ артист, Мариинскэ театрымрэ Театр Инымрэ я унафэщI, УФ-м и Президентым щэнхаб­зэмрэ гъуазджэмкIэ дэлажьэ Советым хэт Гергиев Валерий. Къалэн нэхъы­щхьэр щэнхабзэ щIэинхэр хъумэ­нырщ, абыхэм нэхъыбэ щыгъэгъуэ­зэнырщ, лъэпкъхэм яку дэлъ пщIэмрэ зэныбжьэгъугъэмрэ гъэбыдэнырщ.
ТЕКIУЖЬ Заретэ. 
Сурэтыр Къарей Элинэ трихащ.