Дзэлыкъуэ районым щекIуэкIащ эктремизмэмрэ терроризмэмрэ щIа­лэгъуалэр пэIэщIэ щIыным теу­хуа зэIущIэхэр. Терроризмэм ебэн­хэм я зэкъуэтыныгъэм и ­махуэм ирихьэлIэу къызэрагъэпэща Iуэ­хур щыIащ Дзэлыкъуэ­къуажэрэ Сэр­макърэ щэнхабзэмкIэ я унэхэм.

ЗэIущIэхэм хэтащ къулыкъущIэхэр, егъэджакIуэхэр, жылагъуэ, дин лэжьакIуэхэр, психологхэр, хабзэхъумэ IэнатIэхэм я лIыкIуэхэр, ныбжьыщIэхэр. Дзэлыкъуэкъуажэ щекIуэкIа Iуэхум еблэгъащ «КиберПатруль» клубым и унафэщI Кушбокъуэ Тамерлан, экономикэ щIэныгъэхэмкIэ кандидат, психолог Хьэмыз Аслъэн, КъБР-м ис муслъымэнхэм я дин IуэхущIапIэм и унафэщIым и къуэдзэ КIэрэф Жамболэт, Урысейм и МВД-м и щIыналъэ къудамэм Дзэлыкъуэ районым щыIэ и IуэхущIапIэм и унафэщI Балэ Феликс, дзэ Iуэху хэхам щыIа, физикэмкIэ егъэджакIуэ Къалэжьокъуэ Аслъэн, районым щэнхабзэм­рэ жылагъуэ зэгухьэныгъэхэм ядэ­лэжьэнымкIэ щыIэ къудамэм и уна­фэщI КIурашын Iэсият, щIыналъэм и администрацэм щIалэгъуалэ политикэмкIэ и къудамэм и унафэщI ­Гугъуэт Астемыр. 
Сэрмакъ щекIуэкIа зэIущIэм хэтащ КъБР-м и щIалэгъуалэ центрым и унафэщIым и къуэдзэ Маргъущ Залым, КъБР-м и Парламентым и депутат, дзэ Iуэху хэхам и ветеран Шевчук Герман, балигъыпIэ имыувахэм я IуэхухэмкIэ инспектор Къалэ Мурат, Дзэлыкъуэ районым егъэджэныгъэмкIэ и управленэм и унафэщI КIэмыргуей Лидэ, щIыналъэм и нэ­хъыжьхэм я советым и тхьэмадэ Урысмамбэт Шафихь, «Пэрытхэм я зэщIэхъееныгъэ» зэгухьэныгъэм и модератор Мамсыр Руслан. 
Iуэху щхьэпэм хэтахэр тепсэ­лъы­хьащ щIэпхъаджагъэм пэщIэтынымкIэ, ныбжьыщIэхэр абы щыхъумэ­нымкIэ щыIэ Iэмалхэм, курыт еджапIэм щIэсхэм щIэх-щIэхыурэ ядегъэ­кIуэкIын хуей псалъэмакъхэмрэ ахэр IуэхуфIхэм дегъэхьэхыным папщIэ щапхъэхэмрэ. Къыхагъэщащ лъэпкъ зэхуэмыдэхэм къахэкIахэм, динкIэ зэмылIэужьыгъуэхэм я зэ­хуаку зэгурыIуэныгъэ дэлъыным мыхьэнэшхуэ зэриIэр. 
Хабзэхъумэ IуэхущIапIэхэм ныбжьыщIэхэм я IуэхухэмкIэ я къудамэхэм я лIыкIуэхэр къытеувыIащ хабзэм ебакъуэхэм, щIэпхъаджагъэ зыщIэхэм яхуэгъэзауэ щыIэ тезырхэм, дзэ Iуэху хэхам хэтахэр щIалэгъуалэм ядэгуэшащ я нэгу щIэкIахэмкIэ, тепсэлъыхьащ лIыгъэм, ­Хэку лъагъуныгъэм, жэуаплыныгъэм. ­Районым щыщ нэхъыжьыфI Урысмамбэт Шафихь ныбжьыщIэхэм захуигъэзащ чэнджэщрэ ущиекIэ. Нэхъыжьым пщIэ хуэщIыныр, адэ-анэр лъытэныр, дэIэпыкъуныгъэ хуэныкъуэм уи Iэр хуэпшииныр, хабзэм те­тыныр, ныбжьэгъур гъэпэжыныр зэрыхьэл дахэр ягуригъэIуащ. 
ЗэIущIэхэм щагъэлъэгъуащ­ ­щIэ­п- ­­хъаджагъэм зыдемыгъэ­хьэ­хыным, абы зыщыхъумэным укъы­хуезыджэ видеотеплъэгъуэхэр. Ныб­жьыщIэхэм Iэмал ягъуэтащ къызэхуэсахэм езы­хэр зыгъэпIейтей упщIэхэр иратыну. Нэхъыжьхэм абыхэм жэуап ира-тащ. 

ГУГЪУЭТ Заремэ.