КъМР-ни Башчысы Казбек Коков бла Къырал Думаны депутатлары Геккиланы Заур эмда Виктория Родина, КъМР-ни Правительствосуну Председатели Мусукланы Алий Элбрус районну жамауаты бла Тырныауузда тюбешгендиле. Ала муниципалитетни социал-экономика жаны бла магъаналы сорууларын сюзгендиле. Аны юсюнден республиканы оноучусуну МАХ-да каналында айтылынады.
Повесткада Гирхожан сууда ырхы кетерча илипинле жангыртыу эмда бир ненча башха объектни тапландырыу болгъанды. Спорт инфраструктураны, саулукъ сакълауну, адамланы ташыуну къурауну игилендириуню, жолланы эмда айбатландырыуну юслеринден да баргъанды сёз. Айтылгъан обращенияла, сёзсюз, тинтилликдиле. Дагъыда кёп фатарлы юйлени ремонтлары эмда жылыу баргъан ызланы жангыртыу бла байламлы соруула да кётюрюлгендиле.
Бу ызланы барысында да миллет проектлени, тийрелени комплекс жаны бла айнытыу федерал программаны чеклеринде ишле бардырылгъанларын белгилерчады. Эм алда уа социал бёлюм турады.
Элбрусда амбулатория бла ДК ишленнгендиле, Тырныауузда Маданият къалагъа, ЦРБ поликлиникагъа ремонт этилгенди, Кёнделенде – амбулатория бла сабий сад. Тырныауузну, Кёнделенни, Быллымны, Лашкутаны, Нейтринону, Элбрусну битеулю билим берген махкемелеринде тынгылы ремонт бардырылгъанды. Юч район мектепде спорт залла низамгъа келтирилгендиле, Тырныауузда сабийлени чыгъармачылыкъларын айнытхан арагъа, олимпиада резервли спорт школгъа, школгъа дери билим берген махкемеге ремонт этилгенди. Была арт беш жылда миллет проектлеге бла программалагъа къошулгъан объектлени бир къауумудула.
Бусагъатда Кёнделенде сабий музыка школ ишленеди, Элбрусда сабий садха ремонт этилинеди, Огъары Басханда – мектепге. Эллени бирлеринде суу баргъан ызланы жангыртыу жаны бла ишле тындырыладыла, Чат Башында – 12 километр узунлугъу болгъан жолну тынгылы ремонту.
