Къабарты-Малкъар Республиканы прокуратурасыны ветеран совети бу кюнледе 33-жыллыгъын белгилейди. 1993 жылны август айында къуралып, ол бюгюнлюкде да прокуратураны магъаналы кесеги, профессионал тёрелени сакълаучусу эмда анда шёндю къуллукъ эте тургъанланы чынтты болушлукъчусу болгъанлай къалады.
Аны къауумуна сынамлы прокурорла киредиле: председатели Хачим Машуков, Аниуар Каскулов, Мызыланы Магомет, Шауаланы Виталий, Анзор Ныров. Алагъа ветеран биригиуню ишине тири къатышхан къауум болушады – Алик Емкужев, Мухамед Кармов, Владимир Марьяш, Лариса Шетова, Елена Самойленко, Любовь Хацаева, Лион Мурзаканов, Татьяна Шуева. Ала барысы да бир ниетли адамладыла, прокурор – ол юридический жаны бла бийик билимлиликни бла терек инсанлыкъ эслиликни бирге байлашдыргъан усталыкъ болгъанына тюшюнюпдюле. Тюзлюкню не заманда да къуллугъундан бийикге санауну прокурор эм башына салады. Аны себепли ветеранла прокурор къуллукъну даражасын кётюрюуге энчи эс бурадыла, жаш тёлюню законнга табыныргъа, коррупциягъа эмда зорлукъгъа жол бермезге юйретедиле.
Ветеранла прокурор усталыгъындан ахыры бла да кетип къалмагъанын, ол сынамындан жаш тёлюге юлюш этерге итиннгенин кеси юлгюлеринде кёргюзтедиле. Советни аттестация комиссиягъа эмда ант этиуге жораланнган къууанчлагъа къошуу – ол ведомствону жамауатха керекли ишине бош къатышып къалыу тюйюлдю, жаш специалистлени законнга къуллукъ этиу жашауну айырылмазлыкъ кесеги болгъанына тюшюндюрюудю, аланы тюзлюкге табындырыуду эмда хар оноу ючюн энчи жууаплылыкъны сезерге юйретиудю. Отуз юч жылны ичинде ветеранланы биригиуюню ма ол жорукълагъа табынып келгени заман бла сыналгъанды.
Анга кирген хар ветеран да район эмда шахар прокуратуралада ишлерин бардырадыла. Дагъыда республикалы прокуратураны структуралы бёлюмлерине киредиле. Аллай амал ветеранлагъа бай ишчи сынамларындан жаш тёлюге юлюш этерге, жер-жерлеге барып, методика болушлукъ берирге да онг береди.
КъМР-ни прокурору Николай Хабаров ветеран советни хар башламчылыкъларына себеплик этеди. Сёз ючюн, аны болушлугъу бла Нальчикде энчи прокурор класс ачылгъанды. Ведомствону башчылары насийхатчылыкъны къыйматы ёсерине онгла къурайдыла. Ма аны хайырындан советни аттестация комиссияланы ишлерине, ант этиу эмда чынла бериу бла байламлы жыйылыулагъа къатышыргъа онгу барды.
Алада ветеранла, сыйлы къонакъла болгъанлары бла къалмай, ведомствону кадрла политикасына да юлюшлерин къошханларын сезедиле. Уллу жашау эмда ишчи сынамлары болгъан адамла бла байламлыкъла жюрютюу жаш юристлени тюз ниетде юйретирге онг береди. Билимли насийхатчыланы эмда право низамны сакълаучу ведомствону башчыларыны бир ниетлиликлери уа – Къабарты-Малкъарда прокуратура законлукъну бла тюзлюкню ышаннгылы къалкъаны болгъанлай къалгъаныны ышаннгылы амалыды.
Прокуратураны ветеранларыны бла пенсиячыларыны эркинликлери бла социал излемлери толурларына къайгъырыугъа, жашаудан кетген коллегаланы атлары унутулмазча этиуге совет энчи эс бурады.
Хачим Муридович Машуков КъМР-ни прокуратурасыны ветеран советине 13 жылны башчылыкъ этип тургъанды. Аны жашауу усталыгъына кертичиликни аламат юлгюсюдю. Кёп жылланы бет жарыкълы къуллукъ этгени ючюн ол сыйлы саугъалагъа тийишли болгъанды, «Къабарты-Малкъар Республиканы сыйлы юристи» деген атны махтау бла жюрютгенди.
Россей Федерацияны прокуратурасыны ветеранларыны бла пенсиячыларыны биригиую КъМР-ни прокуратурасыны ветеран советини ишин башхалагъа юлгюге салады. Аны сынамын хайырланыргъа боллугъуну юсюнден айтылгъан энчи письмосун субъектлени битеу прокурорларына бла ветеран биригиулени башчыларына жибергенди. Артыкъда жаш тёлюню патриот ниетде юйретиу къыйматлы къуралгъанына энчи белгиленеди. Дагъыда советге кирген хар ветеранны да, насийхатчылыкъ этиу эмда жаш специалистлени юйретиу бла чекленип къалмай, республикалы прокуратураны бёлюмлери бла, аны къой, кеслери алгъын окъугъан школла бла да, байламлыкъда ишлегенлери ахшы юлгюге саналгъанды.
Акъылбалыкъ болмагъанла бла ишлеуде да кёп тюрлю амалла хайырланыладыла. Аладан бири – тарых кертиликни сакълаугъа жораланнган «тёгерек столланы» бардырыуду. Ол санда прокурор классны окъуучуларына, студентлеге эмда жаш тёлюню бла сабийлени «Биринчилени атламлары» биригиулерини регион бёлюмюню келечилерине Уллу Ата журт урушну жигитлерини, фронтчу прокурорланы, прокуратура органланы уруш жыллада ишлерини юслеринден лекцияла окъуладыла. Дагъыда республиканы прокуратурасыны органлары къалай къуралгъанларыны эмда ишлерин къалай бардыргъанларыны юслеринден хапарлагъан гитче музей прокурорла бла бирге жангыртыла турады.
Андан сора да, ветеранла окъуучула бла шёндюгю къоркъууланы, акъылбалыкъ болмагъанланы къыралгъа бла аны инсанларына къажау ишлеге кимле эмда не ючюн тартханларын, аны ючюн къаллай жууаплы тартылыргъа боллугъун ангылатыу ушакъла бардырадыла. Сёз ючюн, Яникойда Совет Союзну Жигити Байсолтанланы Алимни атын жюрютген орта школда прокуратураны ветеран советине кирген Мызыланы Магомет Чегем районну прокурору бла бирге Уллу Хорламны 81-жыллыгъына аталгъан тюбешиу бардыргъандыла. Ол школну бошагъан Мызыланы Магомет окъуучулагъа Шимал Кавказны халкъларыны араларында Совет Союзну Жигити деген атны биринчи болуп алгъан лётчик-истребитель Байсолтанланы Алим да бу школну бошагъанын билдиргенди, аны жигитлигини юсюнден юлгюле келтирип, сейир хапар айтханды.
Надзор ведомствону келечилери шёндюгю къоркъууланы сылтауларын да ангылатхандыла, акъылбалыкъ болмагъанланы кеслерин алдатмазгъа чакъыргъандыла. Кишиликни дерси керти окъуна хайырлы болгъанды – ата-бабаларыбызны жигитликлерин эсде тутууну къоркъуусузлукъну эмда законнга бойсунууну жорукълары бла байлашдыргъанды.
Дагъыда бир юлгю: Бабугентде Батчаланы Розаны атын жюрютген орта школда Мызыланы Магомет Черек районну прокурору Х.А.Эржибов, аны болушлукъчусу Тогъузаланы Ф.М., «Ата журтну къоруулаучулары» къырал фондну регион бёлюмюню башчысыны аскер къаугъаланы ветеранларыны ишлери жаны бла орунбасары Чеченланы Э.Б. бла бирге Кишиликни эмда патриот ниетде юйретиуню дерсин бардыргъанды. Ол ушакъны кезиуюнде сёз россейли аскерчилени – энчи аскер операцияны жигитлерини юслеринден баргъанды. Къонакъла окъуучулагъа энчи аскер операциягъа къатышханла кеслерин аямай Ата журтну жалынчакъсызлыгъы ючюн къазауат этгенлерин, аланы араларында Черек райондан аскерчиле да болгъанларыны юслеринден хапарлагъандыла, инсанлыкъ жууаплылыкъ не болгъанын ангылатхандыла.
Мызыланы Магомет надзор ведомствода къуллукъ этиу жаны бла сынамыны юсюнден да айтханды, школчуланы адеп-къылыкъ ыздан таймазгъа, право жаны бла билимлерин ёсдюрюрге эмда ата-бабаларыны намысларын тюшюрмезге чакъыргъанды.
Прократураны ветеран совети КъМР-де МВД-ны, РФ-ни Следствие комитетини КъМР-де следствие управлениясыны, Росгвардияны регион управлениясыны ветеран биригиулери, «Ата журтну къоруулаучулары» къырал фондну республикада бёлюмю бла да байламлыкъланы къурагъанды. Аланы бирге бардырылгъан ишлери жаш тёлюню юйретиуню бютюн къыйматлы этеди.
Къабарты-Малкъарны прокуратурасыны ветеран советини 33-жыллыкъ тарыхы тюрлю-тюрлю байрамлагъа, шёндюгю заманны артыкъда магъаналы сорууларына, ол санда Уллу Хорламгъа аталгъан, инсанланы право жаны бла билимлерин кётюрюу, экстремист ниетлени жайгъанла къаллай жууапха тартылыргъа боллугъу бла байламлы соруулагъа жораланып, орта школлада, бийик окъуу юйледе, элледе да дайым бардырылгъан жыйылыуланы, тюбешиулени, ушакъланы, халкъланы араларында шуёхлукъну, миллет бирликни, бир бирге хурмет этиуню, адет-тёрелеге кертичиликни ниетлерин жайыу мурат бла бардырылгъан сурат конкурсла дегенча жетишимли проектлени да хар бири КъМР-ни прокуратурасыны ветеран совети бош жамауат биригиу болуп къалмай, бизни бир юйюбюзде ырахатлыкъ болуруна къайгъырыуну чынтты юлгюсюдю.
Юсюпланы Галина
хазырлагъанды.
