КъБР-м и Iэтащхьэ КIуэкIуэ Казбек лэжьыгъэ IуэхукIэ щы­Iащ Лэскэн районым. ЩIы­на­лъэм и цIыхухэр хэту екIуэкIа зэIущIэм щытеп­сэ­лъыхьащ иужьрей илъэситхум районым и социально-эко­номикэ зыужьыныгъэм къри­кIуахэм, адэкIэ къапэ­щылъ лэжьыгъэхэм. 

Гулъытэ нэхъыбэ хуащIу и гугъу ящIащ УФ-м и Президент Путин Владимир и жэрдэмкIэ къыхалъхьа лъэпкъ проектхэмрэ къэрал программэхэмрэ зэрагъэзащIэм. Апхуэдэу «Къа­лэхэм псэупIэ тынш къыщызэгъэпэщын» программэмкIэ ­зэ­Iу­зэпэщ ящIащ Анзорей, Аргудан, Урыху, нэгъуэщI къуа­жэ­хэм дэт щэнхабзэмкIэ унэхэм къегъэщIылIа щIыпIэхэр.
Гъуэгу ухуэныгъэмкIи зэфIагъэкIахэр мащIэкъым. «Гъуэ­гуфIхэр икIи шынагъуэншэхэр» лъэпкъ проектымкIэ лэжьыгъэхэр къыщрахьэлIащ Анзорей, Урыху, Аргудан, Хьэтуей, Уэзрэдж, Ташлы-Тала къуа­жэхэм. Зэгъэпэщыжыныгъэхэр щрагъэкIуэкIащ Лэскэн II – Анзорей, Лэскэн II – Ерокъуэ - Чикала гъуэгухэм. ЩыIэ жыпхъэхэм хуагъэкIуэжащ Аргудан - Александровскэ гъуэгум щыщ Iыхьэхэр. «ГъащIэм хуэщIа инфраструктурэ» лъэпкъ проектым хыхьэу зыхуей хуагъэзэжащ Лэскэн-I – Лэскэн Ипщэ – Ташлы-Тала – Хъазнидон ­гъуэгур. Апхуэдэу Ташлы-Тала къуа­жэм и уэрамхэм уэздыгъэхэр щыфIадзащ.
Районым и егъэджэныгъэ IэнатIэри къагъэщIэрэщIэж. Таш­лы-Тала курыт школрэ сабий садрэ, Аргудан сабий сад щаухуащ. ЕджапIэхэм я спорт пэшу 9 зыхуей хуагъэзэжащ. Зэгъэпэщыжыныгъэшхуэхэр щрагъэкIуэкIащ Анзорей, Уэзрэдж, Лэскэн ЕтIуанэ дэт школхэм, Анзорей и сабий садым. Апхуэдэ лэжьыгъэхэр мы гъэм щрагъэкIуэкIынущ Аргудан, Анзорей, Хьэтуей, Урыху щыIэ курыт школхэм.
«ЩIалэгъуалэмрэ сабийхэм­рэ» лъэпкъ проектымкIэ, «Егъэ­джэныгъэм зегъэужьын» школ программэмкIэ еджапIэ пэшхэр зыхуэныкъуэкIэ къызэ­рагъэпэщын щIадзащ. Шынагъуэншагъэм и лъабжьэхэр, лэ­жьыгъэм щыхуагъасэ дерсхэр щрагъэкIуэкI пэшхэм папщIэ Iэмэпсымэхэр яIэрыхьащ школи 5-м. АдэкIэ макъамэмкIэ, сурэт щIынымкIэ, физикэмкIэ, математикэмкIэ, биологиемкIэ, химиемкIэ пэшхэр зыхуей-зы­хуэныкъуэкIэ къызэрагъэпэ­щы­нущ. Мэкъумэш класс къы­зэIуахыну загъэхьэзыр.
«Щэнхабзэ» лъэпкъ проектымкIэ зыхуей хуэзэу зэпэщ ящIы­жащ Анзорей дэт ГъуазджэхэмкIэ сабий еджапIэр, Хьэ­туей, Лэскэн ЕтIуанэ, Урыху, Ташлы-Тала, Уэзрэдж щыIэ щэнхабзэмкIэ унэхэр.
Апхуэдэу зэIущIэм щытепсэ­лъыхьащ районым дежкIэ нэхъ мыхьэнэ зиIэ Iуэхухэм. Республикэм и УнафэщIым жиIащ зытепсэлъыхьа псоми унафэ пыухыкIахэр зэрагъуэтынур.