Каменномост (Къармэхьэблэ) къуажэм дэт  курыт еджапIэ №2-р «ЩIалэгъуалэмрэ са­бий­хэмрэ» лъэпкъ проектым хэту зэрахьэри, фо­кIадэм и 1-м ирихьэлIэу и бжэхэр зэIуахыжащ. 

1966 гъэм яухуауэ щыта еджапIэр илъэс 60-м щIигъуат апхуэдиз лэжьыгъэ иращIылIэу зэры­зэ­рамыхьэрэ. ЕкIуу къагъэщIэрэщIэжа курыт еджапIэр къызэIуахыжащ Урысей Федерацэм, Къэбэрдей-Балъкъэрым, Дзэлыкъуэ районым я ныпхэр яIэту. УФ-мрэ КъБР-мрэ я гимнхэр кърагъэуащ. Абы еблэгъащ КъБР-м и Парламентым и депутатхэу Джатэ Русланрэ Бжьахъуэ Ранетэрэ, къызэхуэсащ къуажэдэс нэхъыжьхэр, жылагъуэ лэжьа­кIуэ­хэр, егъэджакIуэхэмрэ еджакIуэхэмрэ. ХьэщIэхэр хъуэхъуащ еджапIэр щIэблэм щIэныгъэм и ­къежьапIэ яхуэхъуну, школым и лэжьакIуэхэм фIы­щIэ ящIащ ар къэрал программэм хиубыдэу къы­зэрагъэщIэрэщIэжам папщIэ. 
1968 гъэм яухуауэ щытащ Псынэдахэ къуажэм дэт курыт еджапIэри. «ЩIалэгъуалэмрэ сабийхэм­рэ» лъэпкъ проектым и фIыгъэкIэ ари къагъэ­щIэрэщIэжащ. ЕджапIэр къыщызэIуахыжым абы еблэгъащ КъБР-м мылъку, щIы зэхущытыкIэхэмкIэ и министр ТIэхъу Аслъэн, Дзэлыкъуэ районым и администрацэм и унафэщIым и къуэдзэхэу Вындыжь Ризуанрэ Кубалов Аслъэнрэ, КъБР-м мэкъу­мэш хозяйствэмкIэ и министерствэм мэкъумэш щIы­пIэхэм заужьынымкIэ и департаментым и уна­фэщI Къардэн Рэмэзан, Дзэлыкъуэ районым егъэ­джэныгъэмкIэ и управленэм и унафэщI КIэ­мыргуей Лидэ, районым цIыхум и хуитыныгъэ­хэмкIэ и уполномоченнэ Теувэж Ильяс, ветеранхэм я щIыпIэ советым и тхьэмадэ Бэрэгъун Арсен, «Бизнес-инкубатор» IуэхущIапIэм и тхьэмадэ Тембот Арсен, Псынэдахэ къуажэ администрацэм и Iэтащхьэ ПщыукI Маринэ. 
Къыхэгъэщыпхъэщ зыхуей хуагъэза курыт еджа­пIэм мэкъумэш класс къызэрыщызэрагъэ­пэ­щар. Ар хуэгъэпсащ щIым, гъавэм, къэкIыгъэ­хэм  теухуауэ  щIэблэм щIэныгъэ ябгъэдэлъхьэ­ным. 
«ЩIалэгъуалэмрэ сабийхэмрэ» проектым хэту зэрахьащ Дзэлыкъуэдэс къуажэм дэт курыт еджапIэри. ЕджапIэм и бжэр къыщызэIуахым къэралым, республикэм, районым я ныпхэр яIэтыну хуа­гъэфэщащ ныбжьыщIэ жылагъуэ зэгухьэныгъэхэм жыджэру хэтхэу Къэшэж Мухьэмэд, Мусэ Дисанэ, Ныр Алихъан сымэ. Iуэхум хэтащ Дзэлыкъуэ районым и администрацэм и унафэщIым и къуэдзэ Вындыжь Ризуан, районым егъэджэныгъэмкIэ и управленэм и унафэщI КIэмыргуей Лидэ, Дзэлыкъуэдэс къуажэ администрацэм и уна­фэщI КIуэкIуэ Жыраслъэн, жылагъуэ лэ­жьакIуэ­хэр. 
ЕджапIэр къыщызэIуахым гъэ еджэгъуэщIэм и япэ уэзджынэр кърагъэуащ 11-нэ классым щеджэ Кърымщокъал Темырланрэ езанэ классым кIуа Маргъущ Ясинэрэ. 

ГУГЪУЭТ Заремэ.