КъБР-м и Iэтащхьэ КIуэкIуэ Казбек УФ-м и Къэрал Думэм и депутатхэу Геккиев Заур, ­Родинэ Викторие, Щхьэгуэш Адэлбий сымэ и гъусэу лэ­жьыгъэ IуэхукIэ Аруан райо­ным щыIащ. КъулыкъущIэ­хэр яхуэзащ щIыналъэм и унафэщIхэм, жылагъуэ зэгухьэныгъэхэм я лIыкIуэхэм, аруандэсхэм. Ахэр тепсэ­лъы­хьащ дызэрыт илъэсым ­къриубыдэу районым игъуэ­-та зыужьыныгъэмрэ къэ­кIуэну лъэхъэнэщIэм хуаIэ мурадхэмрэ, къапэщылъ ­къалэнхэм. 

Республикэм и Iэтащхьэм МАХ-м щиIэ напэкIуэцIым зэ­рыщитхымкIэ, Аруан щIыналъэм, КъБР-м и адрей район­хэми хуэдэу, зыужьыныгъэфI­хэр, зэхъуэкIыныгъэ нэры­лъагъухэр щокIуэкI гъащIэм и лъэныкъуэ куэдым, псом хуэ­мыдэу социальнэ IэнатIэм, лъэпкъ пэхуэщIэ купщIа­фIэ­хэмрэ къэрал программэ инхэмрэ щагъэзащIэу. Апхуэдэу щIыпIэм и псэупIэ-комму­нальнэ хозяйствэм лэжьыгъэфIхэр щызэфIах, «Жылэ­хэм псэукIэр щегъэфIэкIуэн» федеральнэ проектым къы­щыгъэлъэгъуахэм япкъ иткIэ. Абы къриубыдэу Нарткъалэ щрагъэфIэкIуащ фэтэр куэду зэхэт унэхэм къедзылIа пщIантIэ 20-м щIигъу, зэпэщ ящIыжащ Джэрмэншык, Шэрэдж Ищхъэрэ, Мэрзэхъу къуажэхэм я жылагъуэ зэхуэсыпIэхэр. 
КъищынэмыщIауэ, зыхуей-зы­хуэфI куэдкIэ къызэрагъэпэщащ цIыху кIуапIэу щIыпIэм и къалащхьэм иIэ «Нарт» зыгъэп­сэхупIэ паркыр, Шытхьэлэ, Псы­куэд, Старэ Шэрэдж, Псыгуэнсу жылэхэм щыпсэухэм ­зыгъэпсэхупIэу яIэ жыг хадэ цIыкIухэр. «Псы къабзэ» фе­деральнэ программэм ипкъ ­иткIэ Аруан, Старэ Шэрэдж, Къэхъун жылэхэм щаухуащ цIыхухэр псыкIэ къызэгъэ­пэ­щыным хуэщIа IэнатIэхэр. Ап­хуэдэ лэжьыгъэхэр мы зэма­ным щызэфIах Мэрзэхъу къуа­жэм. 
Мыхьэнэшхуэ яIэщ щIыналъэм и гъуэгухэм щекIуэкIа ­лэ­жьыгъэхэми. Старэ Шэрэ­джым, Шэрэдж Ищхъэрэм я уэрам нэхъыщхьэхэм ирикIуэ гъуэгухэр зэпэщ ящIащ. Нарткъалэрэ Аруанрэ, Джэрмэн­шыкрэ Пенькозаводымрэ зэ­пызыщIэ гъуэгухэр, апхуэдэуи Аруан, Джэрмэншык, Шэрэдж Ищхъэрэ, Псыгуэнсурэ Псыгуэнсу 2-мрэ, Нарткъалэ жы­лэхэм я уэрам зыбжанэми ­зэгъэпэщыжыныгъэ-ухуэны­гъэ лэжьыгъэшхуэхэр щекIуэкIащ. Абыхэм асфальтыщIэхэр тралъ­хьащ, гъуэгубгъухэр, лъэс зекIуапIэхэр зыхуей хуа­гъэзэжащ, жыг щхъуантIэхэр, къуацэчыцэ екIухэр щыхасащ. Уэздыгъэхэр щыфIадзащ псори зэхэту километр 18 къы­зэ­щIэзыубыдэ гъуэгухэм. Апхуэ­дэ лэжьыгъэхэр иджыри щокIуэкI Нарткъали, Шытхьэли, Аруани. 
Гулъытэшхуэ зыхуащIхэм ящыщщ щэнхабзэ, егъэджэ­ныгъэ IэнатIэхэр. Абы и щапхъэщ Джэрмэншык, Аруан ­къуажэхэм щэнхабзэмкIэ я унэхэр екIуу зэрызэрагъэпэ­щыжар, Нарткъалэ бгъэIэп­хъуэ хъу библиотекэ къызэ­ры­щы­зэрагъэпэщыр. Егъэ­джэ­ны­гъэ IэнатIэр къэгъэщIэ­рэщIэ­жыным хуэгъэпса про­граммэ щхьэхуэм ипкъ иткIэ къанэ щымыIэу зэрагъэ­пэщыжащ Псыгуэнсу, Старэ Шэрэдж, Чёрнэ Речкэ, Шэрэдж Ищхъэрэ жылэхэм дэт курыт школхэр. Абы хуэщIа лъэпкъ проектыр и лъабжьэу Нарткъалэ щаухуащ еджапIэ унэщIэу тIу, сабий 500, 400 щIэхуэну. Псынабэ къуажэм щащIащ ныбжьыщIи 150-рэ щеджэфыну унэщIэ. Псори зэхэту къапщтэмэ, курыт школу 11-м ще­кIуэкIащ зэгъэпэщыжыныгъэ-ухуэныгъэ лэжьыгъэшхуэхэр. Районым и еджапIэ псоми ­щолажьэ «Зыужьыныгъэм и къежьапIэ» IэнатIэхэр. Апхуэ­дэу щIыналъэм и щIалэгъуа­лэм ядолажьэ «Нарт» щIалэ­гъуалэ центрым и IэщIагъэлIхэр. 
Узыншагъэр хъумэным епха щIыналъэ IэнатIэми зыужьы­ныгъэфI игъуэтащ иужьрей ­зэманым. Районым и сымаджэщ нэхъыщхьэм къепха поликлиникэм лэжьэн щIидзэжащ, иджырей мардэхэм тету абы щрагъэкIуэкIа ухуэныгъэ лэжьыгъэм иужькIэ. Нэсу зэ­рагъэпэщыжащ Джэрмэн­шыкрэ Аруанрэ дэт амбулаторэхэр, Старэ Шэрэджымрэ Шэрэдж Ищхъэрэмрэ амбу­латорэщIэхэр щаухуащ. Ап­хуэдэ лэжьыгъэ щокIуэкI Чёрнэ Речкэ къуажэми. 
ЩIыналъэм и унафэщIхэм адэкIэ къапэщылъ лэжьыгъэ­хэм я гугъу пщIымэ, ап­хуэдэ­хэщ сабий гъэсапIэхэм, щэн­хабзэмрэ спортымрэ я IуэхущIапIэхэм, псы зэрыкIуэ бжьамийхэм, гъуэгухэм ехьэлIа зэ­гъэпэщыжыныгъэ-ухуэныгъэ лэжьыгъэшхуэхэр, нэгъуэщI­хэри.