АДЫГЕЙ. Республикэм и Лъэпкъ музейм и лэжьакIуэхэм мы махуэхэм зыхуагъэхьэзыращ Ингуш Республикэм и Къэрал гъэлъэгъуапIэ галереем, Сунжэ къалэм дэтым, къыщызэIуаха «Черкешенка: гармония, изящество, стиль» проектыр. Абы утыку къыщрахьэнущ адыгэ бзылъхугъэхэм я дахагъэр къызытещ хьэпшыпхэр.
- ЩIыналъэхэм зэдай проектыр республикэм щыпсэухэмрэ и хьэщIэхэмрэ я дежкIэ IэмалыфI хъунущ адыгэ лъэпкъым къыдекIуэкI щэнхабзэ къулейм зыщагъэгъуэзэнымкIэ. КъекIуалIэхэм ялъагъунущ лъэпкъ фащэхэр, зэрызагъэщIэращIэхэр, декоративно-прикладной гъуазджэм и пкъыгъуэхэр, лIэщIыгъуэ куэд хъуауэ адыгэм и щэнхабзэм епхахэр. Проектым гулъытэ хэха щыхуащIащ жьэгур зыхъумэ адыгэ бзылъхугъэм хэлъ зыIыгъыкIэмрэ къарумрэ.
Япэ увыпIэр къихьащ
КЪЭРЭШЕЙ-ШЭРДЖЭС. Даур Аслъэн и цIэр зезыхьэ, щэнхабзэмрэ гъуазджэмкIэ республикэ колледжым и «Пасэрей» ансамблым Абхъазым и Гагрэ къалэм щекIуэкIа фестивалым япэ увыпIэр къыщихьащ.
Зэпеуэм хэтащ республикэхэм я макъамэ къэфакIуэ гупхэр. Къэрэшей-Шэрджэс Республикэм къыбгъэдэкIыу абы щыIащ Хмелевская Екатеринэ и «Исток» композицэр зыгъэзэщIа «Пасэрей» гупыр.
Зэхьэзэхуэр узыIэпишэу екIуэкIащ. КIыхьу зыхуэдгъэхьэзырами, тфIэгъэщIэгъуэнт икIи дригуфIэт апхуэдэ фестиваль зэрыщыIэнум. Абы хэтащ республикэ зэхуэмыдэхэм къикIа къэфакIуэ, макъамэ творческэ гуп куэд. ГъэщIэгъуэнт нэгъуэщI гупхэм хэтхэр зэбгъэцIыхуныр, абыхэм уадэуэршэрыныр, фестивалымрэ республикэмрэ щыIэ щытыкIэр зыхэпщIэныр, - жиIащ ансамблым и унафэщI КIыщмахуэ Олеся.
НэхъапэкIэ Налшык щекIуэкIа «Созвездие талантов» зэпеуэ-фестивалым Гран-при къыщихьауэ щытащ «Пасэрейм». Гупыр щытекIуат «Инструментальное творчество. Ансамбль» унэтIыныгъэм.
УЭРДОКЪУЭ Женя.
