Дерс щхьэхуэхэр куууэ щадж ку­рыт школ № 6-м, къызыхуэтыншэу зэ­рагъэпэщыжа нэужь, Налшык и бжэхэр къыщызэIуихыжащ КъБР-м и Къэралыгъуэм и махуэмрэ ЩIэ­ныгъэм и махуэмрэ ирихьэлIэу. 

«КъБР-м егъэджэныгъэм зыще­гъэу­жьын» къэрал программэр зэрагъэзащIэм и фIыгъэкIэ еджапIэр гъэ еджэгъуэщIэм и пэщIэдзэм ирихьэлIэу хьэзыр хъуащ: ухуакIуэхэм унащхьэмрэ блынхэмрэ къагъэ­щIэрэщIэжащ, инженер хуэIухуэ­щIэ­хэр зэрахъуэкIри, и кIуэцIыр зыхуей хуагъэзащ. ФокIадэм и 1-м ныбжьыщIэхэм тыгъэ хуащIащ егъэ­джэ­ныгъэ Iуэхум сыт и лъэныкъуэкIи хуэ­хьэзыр еджапIэр.
Школым и гъащIэм щыщ IыхьэщIэр щаублэ дауэдапщэм хэтащ КъБР-м и Парламентым и УнафэщI Егоровэ ­Татьянэ, Налшык къалэм и прокурор Къанщауэ Аслъэн, Налшык къалэм и щIыпIэ администрацэм и Iэтащхьэм и япэ къуэдзэ Храмцов Алексей, дзэ Iуэху хэхам и ветеранхэр, къалэм егъэджэныгъэмкIэ и департаментым и лIыкIуэхэр.
Махуэшхуэм щIадзащ къэрал ­гимнхэр ягъэзащIэу, Урысей Федерацэмрэ Къэбэрдей-Балъкъэр Респуб­ликэмрэ я ныпхэр яIэту.
ХьэщIэхэм, еджакIуэхэм, адэ-анэ­хэм, егъэджакIуэхэм фIэхъус щарихым, курыт школ № 6-м и директор ­Текуев Аслъэн фIыщIэ яхуищIащ ­республикэм и унафэщIхэм, ухуа­кIуэ­хэм, адэ-анэхэм, школыр и чэзум зэ­рагъэпэщыжауэ къызэIухыным хэ­лIыфIыхьа псоми. Ар еджакIуэхэм ехъуэхъуащ ехъулIэныгъэхэр яIэну. Школ унафэщIым къыхигъэщащ ­ныбжьыщIэхэм я зэныбжьэгъугъэр щапхъэфIу зэрилъагъур, мы гъэр Уры­сейм и лъэпкъхэм я зэкъуэтыныгъэм и илъэсу зэрагъэувам ипкъ иткIэ. Мы школым лъэпкъ зэмылIэужьыгъуэ 30-м щIигъум щыщ сабийхэр щоджэ.
Къызэхуэсахэм ЩIэныгъэм и махуэмрэ ныбжьыщIэхэм я гъэ еджэ­гъуэщIэм зэрыщIидзэмкIэ ехъуэ­хъуащ КъБР-м и Парламентым и Уна­фэщI Егоровэ Татьянэ:
- Нобэрей зэманым дэтхэнэ цIыхуми и гъащIэм щIэныгъэм мыхьэнэшхуэ щиIэщ. Абы къыхэкIыу фокIа­дэм и 1-р IуэхущIэхэмрэ Iэмалы­щIэ­хэмрэ я дамыгъэу жыпIэ хъунущ, - къыщIидзащ и псалъэм Егоровэ Та­тьянэ. - Нобэ махуэшхуэр щагъэ­лъа­пIэ сабий гъэсапIэм къыщыщIэ­дзауэ еджапIэ нэхъыщхьэхэм щыщIэ­кIыжу. Ауэ гулъытэ хэха зиIэр, дауи, школырщ. Ар икIи гурыIуэгъуэщ, сыт щхьэкIэ жыпIэмэ, школ илъэсхэм нэхъ телъыджэ, нэхъ гукъинэж щыIэкъым. А илъэсхэращ цIыхум и къэу­хьыр, дуней еплъыкIэр щызэфIэувэр, и зэчийхэмрэ зэфIэкIхэмрэ къы­щы­зэIуихыр. ЩIэныгъэм и махуэр еджэми езыгъаджэ псоми я махуэшхуэщ. ЕгъэджакIуэхэм я дежкIэ ар лэжьыгъэм и лъэхъэнэщIэщ, я гъэсэнхэм щаIущIэ гуфIэгъуэщ. ЕджакIуэхэм я дежкIэ - гъащIэм и лъэбакъуэщIэщ, къэхутэныгъэщIэхэм я щIэдзапIэщ. Класс нэхъыжьхэм щIэсхэм я дежкIэ - адэкIэ я гъуэгур къыхахынымкIэ илъэс нэхъыщхьэщ. Ауэ псом нэхърэ мы махуэм мыхьэнэшхуэ иIэщ гъа­-щIэ гъэщIэгъуэным япэу лъэбакъуэ хэзычэ цIыкIухэм - езанэ классым кIуэхэм - я дежкIэ. Дэтхэнэми щIэ­ныгъэм и дуней телъыджэм мы махуэр щIэдзапIэфI хурехъу! 
Хабзэубзыху IуэхущIапIэм и Уна­фэщIым къыхигъэщащ мы зэманым къэралми республикэми куэд дыдэ зэрыщащIэр егъэджэныгъэр иджы­рей мардэхэм тету къызэрагъэпэ­щын, сабийхэм я зэфIэкIхэм зрагъэу­жьын папщIэ. «Абы и щапхъэщ нобэ дыкъыздеблэгъа школым щытлъагъу зэхъуэкIыныгъэфIхэр. ЕджапIэм и ­теплъэр ефIэкIуа къудейкъым - ар IэмэпсымэщIэхэмкIэ, иджырей IэмалхэмкIэ къызэгъэпэщащ. Ахэр, шэч хэмылъу, яхуэщхьэпэнущ ныбжьыщIэхэм щIэныгъэ куу ягъуэ­тынымкIэ», - дыщIигъуащ Егоровэм.
ФокIадэм и 1-р республикэм деж­-кIэ махуэшхуэ тIуащIэу зэрыщытыр къыхигъэщри, Егоровэ Татьянэ къы­зэхуэсахэм ехъуэхъуащ КъБР-м и Къэралыгъуэм и махуэмкIи.
- ФIыуэ тлъагъу ди республикэм и махуэри догъэлъапIэ. Ди къэкIуэнур фэращи, зыщывмыгъэгъупщэ фи дэтхэнэ ехъулIэныгъэри ди Къэ­бэрдей-Балъкъэрым и зыужьыныгъэм и хэлъхьэныгъэу зэрыщытыр. Псом нэхърэ нэхъыщхьэр ди къэралышхуэм хуэфащэ цIыхуу, фи хэку­шхуэмрэ фи хэку цIыкIумрэ фIыуэ флъагъуу фыкъэхъунырщ. Нобэ псоми сехъуэхъуну сыхуейщ узыншагъэ быдэ, насып яIэну, ди егъэджакIуэ­хэм - сабийхэм я зэчийр къагъэ­нэ­Iуэфыну, еджакIуэхэм - щIэныгъэм и фIагъыр зыхащIэну, адэ-анэхэм - я бынхэм иригушхуэну, - дыщIигъуащ Егоровэм.
КъагъэщIэрэщIэжа школым щIэныгъэм и махуэр гукъинэжу щагъэ­лъэпIащ. Абы хъуэхъу гуапэхэр къы­щыIурт, сабийхэмрэ адэ-анэхэмрэ я нэжэгужагъым гур хигъахъуэрт. Ап­хуэдэу къэхутэныгъэхэмкIэ, ехъулIэ­ныгъэхэмкIэ, Iуэхугъуэ гъэщIэгъуэнхэмкIэ гъэнщIауэ щытыну гъэ еджэгъуэм щIидзащ.
Курыт школ №6-р зэрызэрагъэ­пэ­щыжам и мызакъуэу, Налшык щыпсэу ныбжьыщIэхэм я зэфIэкIыр сэтей къэзыщIыфыну, фIагъ лъагэ зиIэ щIэ­ныгъэ щратыфыну еджапIэ ­хъуащ. Мыбы Iэмал псори къыщы­зэрагъэпэщащ дэтхэнэ еджакIуэми гулъытэ иIэн хуэдэу.