КъБР-м щыIэ МВД-м Наркотикхэр зэрызэрагъакIуэм кIэлъыплъынымкIэ и управленэм щекIуэкIащ зэзыгъэуIу штабым и зэIущIэ. Ар теухуащ щIалэгъуалэр наркотикхэм демыгъэхьэхыным хуэгъэпса ведомствэхэм зэдай «Ди сабийхэм я узыншагъэмрэ шынагъуэншагъэмрэ папщIэ» акцэм и къыкIэлъыкIуэ Iыхьэр егъэжьэным. Iуэхум и къызэгъэпэщакIуэщ КъБР-м щыIэ МВД-р.
Мы гъэм акцэр IыхьитIу йокIуэкI: япэр иухащ накъыгъэм, етIуанэр фокIадэм и 1-м щыщIэдзауэ дыгъэгъазэм и 16-м къриубыдэнущ.
Лэжьыгъэм хэтщ Урысей ФСИН-м и управленэу КъБР-м щыIэм и лэжьакIуэхэмрэ республикэ министерствэхэм ящыщхэмрэ: Егъэджэныгъэмрэ щIэныгъэмкIэ, Узыншагъэр хъумэнымкIэ, ЩэнхабзэмкIэ, Лъэпкъ Iуэхухэмрэ жылагъуэ проектхэмкIэ, ЩIалэгъуалэм я IуэхухэмкIэ, СпортымкIэ, Бжыгъэхэр зи лъабжьэ зыужьыныгъэмкIэ, связымрэ цIыхубэ зэпыщIэныгъэхэмкIэ министерствэхэр.
Iуэху нэхъыщхьэр - адэ-анэхэм, егъэджакIуэхэмрэ жылагъуэ IуэхущIапIэхэмрэ я къарур щызэгъэуIунырщ балигъ мыхъуахэр наркотикым демыгъэхьэхыным. Лэжьыгъэхэр щрагъэкIуэкIынущ школхэм, сабий унэхэмрэ интернатхэмрэ, профилактикэ лэжьыгъэ зэхуэмыдэхэм къриубыдэу лекцэхэр, семинархэр, стIол хъурейхэр, тренингхэр, тематикэ дерсхэмрэ класс сыхьэтхэмрэ, апхуэдэуи интерактив джэгукIэхэр, зэпеуэхэр. Акцэм хэтынущ спортсмен цIэрыIуэхэр, щэнхабзэмрэ динымрэ я лэжьакIуэхэр икIи сэбэп хъунущ къаIэта Iуэхум щIалэгъуалэм гу лърагъэтэнымрэ профилактикэм и купщIэр ефIэкIуэнымкIэ.
Апхуэдэ лэжьыгъэм нэмыщI, къэпщытэныгъэхэр щрагъэкIуэкIынущ сату щащIхэм, аптекэхэмрэ щIалэгъуалэр куэду щызэхуэс щIыпIэхэмрэ - хуит ямыщI препаратхэр хабзэншагъэкIэ ящэмэ, балигъ мыхъуахэм наркотикхэр зрахьэлIэмэ къыщIагъэщын папщIэ.
КъБР-м щыIэ МВД-м Наркотикхэр зэрызэрагъакIуэм кIэлъыплъынымкIэ и управленэм цIыхухэр къыхуреджэ хабзэншагъэкIэ наркотикхэр зэрырагъэкIым щыгъуазэмэ, хъыбар кърагъэщIэну. Абы папщIэ захуэбгъазэ хъунущ мы телефонхэмкIэ: 02 е 101 (мобиль операторхэм), КъБР-м щыIэ МВД-м и плъыр частым мы номерымкIэ (8662) 40-49-10 е КъБР-м щыIэ МВД-м дзыхь зрагъэз и телефонымкIэ: (8662) 49-50-62.
ДЫГУЛЫБГЪУ Жантинэ.
