РФ-ни Къырал Думасыны депутаты Ирина Марьяш Нальчикде «Единая Россия» политика партияны приёмныйинде тюбешиу бардыргъанды. Битеу да ол кюн ары 12 адам келгенди.
Биринчи болуп фенилкетонурия ауруудан къыйналгъан сабийлени аналары Жолайланы Оксана бла Альбина Мизова киргендиле. Аллай саусузланы саны бюгюнлюкде 21-ге жетеди. Биринчи айтханнга кёре, аладан сора, 4 абадан адам да барды. Была барысы да бек къаты диетада турадыла.
Аланы къанларына белок тюшмезге керекди. Аны себепли къырал аллай сабийлеге 14 жыл толгъунчу аланы инвалидлеге санап, керек препаратла бла жалчытып турады. Болсада андан ары бу къыйын жумуш ата-аналаны боюнларына тюшеди. Оксана ангылатханнга кёре, диетаны ол саусузла саулай жашауларында тутханлай турургъа керекдиле. Ансыз ауруу аланы ашап, олигафренлени къауумуна ётдюрюп къояды. Андан артха уа, барыбыз да билгенден, жол жокъду. Анала Ирина Марьяшдан аланы сабийлерин республика керек препаратла бла эм аш-суу бла 18 жылларына дери жалчытырын излеп келгендиле.
-Кёп субъектледе ол барды. Мен Парламентде да сёлешиулеге къатышып, бу жарсыуну юсюнден айтхан эдим. Этден этилген ашарыкъла жарамагъанлары себепли сабийлерибизге аны алышхан сосискала сатып алабыз.
Аллай алтыны уа багъасы 900 сомду. Посылка ючюн да 500 сом тёлейсе. Сора заказны уа бек аздан 15 минг сом багъасы этерге керекди. Ата-аналаны аллай ахчалары болмагъанын барыбыз да ангылайбыз. Алайсыз да кёпле кредитле окъуна алып жашайдыла, сабийлерин диетада тутар ючюн. Ансыз аны халы болмагъанча осалгъа кетип къаллыкъды. Тилейбиз, болушугъуз бизге, - деп бошагъанды Оксана сёзюн. Ирина Евгеньевна бу вопросну магъаналыгъын чертип, аны энчи контрольгъа алыргъа сёз бергенди.
Ызы бла приёмгъа Идаров орамда жашагъанланы къаууму киргенди. Аланы жарсыулары  аланы юйлерини къатындагъы гитче солуу паркны жеринде энчи предприниматель къурулуш башлап бардыргъаны бла байламлы эди.
Адамла айтханнга кёре, 10 январьдан бери алайда къурулуш ишле бардырыладыла. Юч ыйыкъны ичинде ол салына тургъан мекямны башын окъуна жапхандыла. Ала участковыйни чакъыргъанларында, къурулушчула анга Нальчик шахарны администрациясындан ишлени бардырыргъа эркинлик берген къагъытны кёргюзтгендиле.
Алай ол тийредеги юйледе 800-ден аслам фатар барды. Алайда тургъан адамланы жаланда ол паркды къууанчлары. Андан башха аланы шинтикде олтуруп, хауа солур жерлери жокъду. Аны тап халда тутар ючюн, ала кеси хуржунларындан ахча тёлеп да тургъандыла.
Ирина Марьяш алагъа тынгылагъандан сора ол жерни ала приватизация этгенлерин бла къалгъанларын соргъанды. Приёмгъа келгенле айтханнга кёре, аны алай этерге кереклисин алагъа бир заманда биреу да ангылатмагъанын билдиргендиле. Жетинчи номерли ЖЭК-ни таматалары аланы юйлени тийресиндеги жер аланыкъы болгъанына ийнандырып тургъанды.
Депутат ол кюн окъуна къурулуш бардырылгъан жерге мэриядан да адамны биргесине алып барыргъа сёз бергенди.
-Жарсыугъа, адамларыбызны право жаны бла билимлери бек осалды. Гражданла неге эркинликлери болгъанын окъуна билмейдиле. Ма бу вопрос бла байламлы биз аны ачыкъ кёребиз. Жер муниципалитетни иелигинде эсе, ол къурулушха бир зат этген къыйын боллукъду. Нек дегенде юридический жаны бла мэрия тюз болуп чыгъарыкъды. Алай РФ-ни Президенти Владимир Путин кесини посланиясында гражданланы сейирлерин къорууларгъа деген буйрукъ бергенди да, биз, депутатла, аны толтуруугъа энчи эс бёле ишлерге борчлубуз. Битеу мында айтылгъан жарсыулагъа не аз амал болгъан къадарда болушургъа кюреширикме, - дегенди Ирина Марьяш.