Нальчик шахарны генерал Зокаланы Валерий атлы 8-чи номерли школунда жангы окъуу жылны башланнганы, хар замандача, къууанчлы халда баргъанды. Жыйылыуну школну директору   Геккиланы Далхатны къызы Шерегова Зарема ачханды. Ол ары келген къонакъланы, ата-аналаны, окъуучуланы Билимни кюню, Къабарты-Малкъарны къыраллыгъыны кюню, Нальчик шахарны кюню бла, жангы окъуу жылны башланнганы бла да алгъышлагъанды.

Ол: «Бюгюн бери келгенлеге ыразылыгъымы айтыргъа сюеме, барыгъызгъа да саулукъ, мамыр жашау тежейме. Бек алгъа уа мен биринчи классха келгенлени алгъышларгъа сюеме. Багъалы жашчыкъла бла къызчыкъла! Бюгюн сизге деп биринчи кере къонгуроу къагъылгъанды. Энди сизни бу школда сейир дерсле, сейир ишле, таитлы шуёхла, сюйген устазла сакълайдыла. Хош келигиз!» – дегенди эм ары жыйылгъанланы – ата-аналаны, ахлуланы да ол гитче сабийлени быйыл школну бошай тургъан жашла эм къызла бла тенглешдирирге чакъыргъанды. Зарема Далхатовна ол гитчечикле, ёсюп, билимли болуп, 11-чи классны бошап, жашау жолгъа атланнгынчыгъа алагъа устазла къаллай бир къыйын салгъанларын эсгертгенди эмда биргесине ишлегенлеге жюрек ыразылыгъын айтханды, алагъа саулукъ, тёзюмлюк тилегенди.

Ата-аналагъа айланып, ол: «Энди бизни муратларыбыз бир болгъандыла. Биз бирге ишлерге, бу сабийлени Ата журтну сюйген, анга къайгъыргъан, адамлыкъ шартланы бийикде тутхан инсанла этип ёсдюрюрге, жашаугъа юйретирге керекбиз. Арада келишиулюк болуруна ийнанама, – дегенди. Сора, школну быйыл бошарыкъ жашлагъа бла къызлагъа айланып: – Сизни усталыкъ сайлар заманыгъыз жетгенди. Ол керекли сайлауну тюз этгенигизге кёре боллукъду мындан ары жашауугъуз. Аны сабыр акъыл бла этеригигизге ышанама», – дегенди. 

Ызы бла Къабарты-Малкъарны Парламентини Билим бериу, илму, физкультура, спорт эм жаш тёлю жаны бла комитенини председатели Нина Емузова сёлешгенди. «Жангы окъуу жыл башланады. Жангы деп нек айтабыз? Ол магъанасы бла, окъуу китапла бла, программа жаны бла жангыды. Сиз алыкъа ол жылны жашамагъансыз да, аны бла жынгыды. Бюгюн байрам кюндю, къыраллыгъыбызны, шахарыбызны да кюнюдю. Байрамла кюн узуну барлыкъдыла.  Булутла да аны билип къачханча кёрюнеди. Мен бу школну бар окъуу юйледен да бек сюеме. Шахарыбызны жасаууча кёрюнеди бу жылыулу, ариу арбазлы юй манга. Ата-анала, бу школ, сизни сабийлеригиз окъугъан жер, сизге жууукъ болса сюеме», – деп, таматалагъа сабийлеге да саулукъ, жарыкъ мамыр жашау тежегенди Нина Гузеровна.

Поэт, жазыучу Мусукаланы Сакинат, сабийлени алгъышлай, алагъа школну тарыхындан къысха хапар айтханды. «Сизни школугъузну тарыхы ёмюр чакълы бола келеди – юй школдан къырал школгъа дери ёсгенди ол. Уруш жыллада мында госпиталь болгъанды. Бу мекямны къабыргъалары керти жигитлени таныгъандыла. Школ генералны атын жюрютгени да белгилерча шартды. Иги окъургъа кюрешигиз.  Билим – ол бар байлыкъладан да сыйлы затды, хар бир адамны энчи кючюдю. Ол не тюрлю эшиклени да ачады.  Бизни гитче республикабызда билимли, махтаулу адамла кёпдюле, сёз ючюн, эки жюз бла жарымдан аслам илму доктор барды. Ала атом энергетикадан башлап, космос тинтиулеге дери иш бардырадыла. Аллай игилерибизге ушаргъа итинигиз», – деп, кёллендиргенди ол сабийлени.

Андан сора да башха къонакъла алгъышлагъандыла сабийлени, устазланы да. Аланы араларында Росгвардияны Къабарты-Малкъарда управлениясыны келечилери да болгъандыла: полицияны полковникниги Абдулхаким Гаджиев эмда территориал органны ветеран биригиуюню таматасы, полицияны отставкадагъы полковниги Руслан Хужоков. Управленияда ишлегенлени барысыны да атларындан ата-аналаны, устазланы, окъуучуланы да бу энчи кюн бла Руслан Бетужанович алгъышлагъанды.

Ол къууанчлы кюннге алдан хазырланнган сабийле жырлагъан, тепсеген да этгендиле. Онбиринчи классны окъуучуларын, андан ары жашау жоллары бийик болсун деген белги бла, ызларындан келгенле къагъыт самолётчукъла бла саугъалагъандыла. Тамата классланы окъуучулары гитчечиклеге энчи саугъала да бергендиле.

Ызы бла биринчи классха келгенле кёкге шарла ийгендиле.

Кертиланы Сакинат.