Ара шахарыбыз Нальчик айный, ариудан-ариу бола баргъанын, анда жашагъанланы жашауларын ырахатлы, монглу да этер ючюн кёп тюрлю мадарла этилгенлерин да кёребиз. Сёз ючюн, жолланы бла орамланы юслеринден айтсакъ, ала тапландырыладыла, кенгередиле, жанларында тийреле да кёзге ариу кёрюнюрча этиледиле.
Нальчикге паркны ичиндеги шахар деп бошдан айтхан болмазла. Керти окъуна, терекле, юлкюле, гюлле хар мюйюшюнде да ёседиле. Алгъын бир къауум орамла бла барсанг, гитче, эртте ишленнген энчи юйчюкле болуучу эдиле. Бусагъатда аланы орунларына архитектура жаны бла эс бурурча, кёп къатлы, уллу да, омакъ да журтла сюеледиле. Сёз ючюн, бир ауукъ заманны ол неда башха орамда болмай, ары тюшсек, танымай къоябыз.
Абаданлагъа, жаш тёлюге, сабийлеге деп тюрлю-тюрлю къыллаучалары бла солуу паркыбыз, Жашил театрыбыз, уллу тюкенлерибиз ишлейдиле. Аланы шахарны хар къалайында да кёрюрге боллукъду. Тюкенле шёндюгю заманны сурамына тийишлидиле. Ана-атала сатыу-алыу ишлерин эте тургъунчу, сабийлери ойнап, зауукълукъ алырча жерлери барды.
Дагъыда къаллай бир къонакъ келеди бизге саулукъларын игилендирирге, таулагъа чыгъаргъа, ариу таза хауа бла солургъа, шаудан, гара сууларыбыздан ичерге. «Нальчик» черекни жагъасы бла ётген «Къабарты-Малкъаргъа – 100 жыл» деген жаяу жолубуз а! Аны бла сау кюнню, аны къой, кече сагъат тогъузгъа-оннга дери да уллу, гитче да жюрюгенлерин кёрюрге боллукъду. Ырахат солургъа сюе эсенг, тынчлыкълы шинтиклеге олтур, санларынгы тирилтирге сюе эсенг а, жараула эт. Анга спорт керекле бардыла. Тизгинлилик, тазалыкъ хар жерде да эсленеди.
Алгъын автобусну сакълап кёп заманны сюелип тургъан эсек, бусагъатда шахарны къалайына да онбеш-жыйырма такъыйкъаны ичинде жетесе. Сюйсенг, автобусха олтур да бар, угъай, дей эсенг а, маршрут эмда гитче автомобиль таксиле да бардыла.
Шахарны орамларында тыш къыраллы, омакъ машинала кёпдюле. Тойла, къурманлыкъла, башха къууанчла уа ариу халда, бай столла бла бардырыладыла. Ала уа адамларыбызны къолайлыкъларыны ёсгенлерини шагъатыдыла.
Шахарда республикалы, битеуроссей, халкъла аралы даражада да тюрлю-тюрлю байрамла бардырыладыла. Магъаналы спорт эришиулеге, фестивальлагъа, ингирлеге, тюбешиулеге белгили къонакъла да келедиле. Алайды да, шахар жашнайды, тамблагъы кюннге таукел къарайды!
Холаланы Марзият.
