Къабарты-Малкъарны Правительствосуну Председатели Мусукланы Алий эмда КъМР-ни  курортла эм туризм министри Аскер Бифов «Гедуко» бла «Янтарный» саулукъландырыу  аралагъа ишчи жолоучулукъну чеклеринде баргъандыла, аланы ырысхы-техника болумларына, адамланы солууларын къурау  онгларына къарагъандыла. 
«Гедуко» Басхан райондады. Анда саулукъну  кючлеу жаны бла кёп тюрлю жумушла тамамланыладыла. Исси эм сууукъ суулары бла бассейнле, гидромассаж ваннала, сабийлеге дайым жылынып тургъан суулары бла «суу шахарчыкъ», туз отоуу бла спа-ара, багъыу агъачдан ишленнген орунлада жыйылгъан суула – ала барысы да солугъанланы сакълайдыла. Юйюрлери бла келгенлеге дагъыда бир ахшылыгъы – таза хауада шишлик эм башха азыкъла биширирча жерле, миллет ашарыкълары бла ашхана да бардыла. Картинг арада уа тири солууну сюйген жаш адамла, абаданла да заманларын зауукълу ётдюраллыкъдыла. 
«Янтарныйни» юсюнден айтханда, аны айнытыргъа, къонакъ юйлени  кёбейтирге, машиналаны салырча жерле бёлюрге белгиленеди. Алай бла ол Прохладныйде шёндюгюлю излемлеге келишген уллу  турист ара боллукъду.  
Ишчи жолоучулукъдан сора Мусукланы Алий, солуу арала экономика, социал жаны бла да уллу магъананы тутханларын белгилеп, регионда туризмни айнытыуну чегинде багъыу-саулукъландырыу  жерлени игилендирирге кереклисин чертгенди, деп билдириледи Курортла эм туризм министерствону МАХ-да каналында.