Жангы окъуу жыл башланырны аллында республиканы Башчысы Казбек Коков Регионнга оноу этиу араны (ЦУР) таматасы Мадина Кадыкоева бла ушакъ этгенди. Тёреге айланнган тюбешиуде сёз билим бериуню юсюнден баргъанды. Мектепле, устазла, окъуучула, жетишимле эмда тыйгъычла – аланы юсюнден жик жиги бла айтылгъанды. Башчы бу бёлюмге къарамын туура этгенди, умутла эмда шартла бла да шагъырейлендиргенди.
Къысха шартла
Къабарты-Малкъарда билим бериу бёлюм бек уллуду – аны жумушларын хайырланнганланы саны жюз мингле бла тергеледи. Казбек Валерьевич билдиргенича, келир айда орта школлагъа – 122, садиклеге да 46 минг сабий атланырыкъдыла. Энчи орта билим берген учрежденияла уа жыйырмадан аслам минг окъуучугъа эшиклерин ачарыкъдыла.
Къошакъ билим берген бёлюм да магъаналы жерни алады. Бюгюнлюкде бизни республикада тюрлю-тюрлю кружоклагъа эмда секциялагъа 137 минг чакълы сабий жюрюйдю. Бу шарт, тёрели билим бериу программадан тышында да, школчуланы арасында кеслерин айнытыугъа, хунерликлерин ачыкълаугъа сурам болгъанын кёргюзтеди.
Чеклениуле бла умутла
Мюлк-техника онгла болмай, окъутууну къыйматы иги болуруну юсюнден айтыр амал жокъду. Бир-бир мектепледе жер къытлыкъны хатасындан билим бериу ишни эки сменнге кёчюрюрге тюшеди. Быллай шартла Нальчикде эмда Басхан шахар округда бардыла; шёндюге дери ол халда 27 школ ишлей эди.
Алай ахыр беш жылны ичинде уа болум тюрленнгенди. «Биз 2019 жылдан бери 24 жангы мектеп сюегенбиз. Алагъа 13 мингден артыкъ сабий жюрюйдю. Аны хайырындан ишлерин эки сменде бардыргъан орта билим берген учрежденияланы саны азайгъанды, аллайладан энди онжетиси къалгъанды», - деп чертгенди Казбек Коков.
