КъМР-ни Курортла эм туризм министерствосу билдиргеннге кёре, Нальчикни Маданиятны айнытыуну арасында «Мени Планетам» телеканалны «Мени Дуниям.Табийгъат.Адамла. Жолоучулукъ» деген сурат кёрмючю ачылгъанды. Ол ишин 3 октябрьге дери бардырлыкъды.   
Бу кёрмюч бирикдирген суратла жер жюзюню тюрлю-тюрлю жерлеринде, ол санда Къабарты-Малкъарда да алыннгандыла. Келгенле тамаша табийгъатны, кийик жаныуарланы, дуния маданиятны, адет-тёрелени битеу байлыкъларын кёргюзтген суратланы кёрлюкдюле. 
«Кёрмючню бизни арада ачылгъаны шахарыбызгъа магъаналы маданият ишди. Республикабызны ариу табийгъатын эм халкъларыбызны суратларын алай ариу ачыкълагъан телеканалгъа ыразылыгъыбызны билдиребиз», - дегенди Нальчикни Маданиятны айнытыуну арасыны таматасы Саида Жанимова.
Проект бек ариу жерлеге жолоучулукъгъа чакъырады. Баш ишлени араларында – Куэнга сууну башында кюнню биринчи таякълары, Ингушетияны деменгили таулары, Камчаткада жашагъан халкъланы тёрели тепсеулери, Алчак сууну жагъаларында кюнбатышны сейирлик бояулары.
– Бизни кёрмючюбюз къыралда кесини уллу жолоучулугъун бардыргъанына бек къууанабыз, энди кезиу Россейни бек ариу эм къонакъланы сюйген регионуна – Къабарты-Малкъаргъа – жетгенди.  Быйыл бизни сурат жыйымдыгъыбызгъа былайда этилген ишле киргендиле: табийгъатлары бла сейирсиндирген жерле - деменгили Минги тау бла белгили Жылы-Суу. Бу кёрмючню энчилиги - суратда дунияны кёп жанларын, ол санда табийгъатны байлыгъын, адамланы эм аланы адет-тёрелерин бир такъыйкъада кёргюзтюудю, - деп чертгенди «Мени Планетам» телеканалны баш редактору Роман Лобашов. 
Кёрмюч Нальчик шахарда, Ашуров атлы орамны 1-чи юйюнде (Нальчикни Маданиятны айнытыуну арасы) орналгъанды. Анга кирген хакъсызды.

ЛАЙПАНЛАНЫ Мадина 
хазырлагъанды.