«Машук – 2026» форумгъа къатышханла энчи аскер операцияны ветераны, Кишиликни эмда Преподобный Сергий Радонежскийни орденлерини кавалери, «Россейни офицерлери» битеукъырал биригиуню президиумуну келечиси Виктор Дядюра бла тюбешгендиле. 
Ушакъ жигитни жашау эм аскерчи жолуну, энчи аскер операцияда кёргюзтген кишилигини, къазауатдан жаралы болуп къайтханындан сора бардыргъан жарыкъландырыу ишини юсюнден хапарлаудан башланнганды.
- Мен аскерчилени юйюрлеринде туугъанма, аны ючюн абадан кезиуюмде къайсы усталыкъны сайларыгъыма ишекли болмагъанма, - дейди Виктор Дядюра. – 2023 жылны ахырында жаралы болгъанымдан сора, аягъыма протез салыннганды. Сау болгъанлай, жангыдан энчи аскер операция бардырылгъан жерге къайтып, анда дагъыда жарым жылны тургъанма. Бюгюнлюкде Москва областьны Щёлково шахар округуну башчысыны кенгешчисиме, «Штурмовик» аскер-патриот биригиуге башчылыкъ этеме, муратым  – сынамыма жаш тёлюню юйретирге. 
Форумчула сыйлы къонакъгъа тюрлю-тюрлю соруула бергендиле. Бютюнда бек  ала ёсюп келген тёлюлени Ата журтха таза сюймекликни ниетинде юйретиуню юсюнден билирге излегендиле. Аскерчи адам чынтты кишиликге жангызда кёз аллында юлгю болса юйреналлыгъын белгилегенди. «Мени аллай юлгюм бар эди, ата-бабам. Хар сабийге да бусагъатда СВО-да болгъан неда башха жаны бла атларын айтдыргъан жууукъ-ахлуларыны, тарыхда ызларын къойгъан айтхылыкъ инсанланы араларында аллай юлгюню кёргюзтюрге керекди. «Штурмовикни» да ол умут бла къурагъанбыз. Анда жаш адамла  жыл санларына, акъылларыны айныуларына кёре хазырланыуну ётедиле. Къыйын къылыкълылагъа насийхатчылыкъны СВО-ну ветеранлары бардырадыла. Алай бла биригиуюбюзде жаш патриотланы ёсдюребиз, алагъа жамауат жашауда жерлерин табаргъа болушабыз»,- дегенди ол. 
Жаш адамла бусагъатда журтубузну къоруулагъан аскерчилеге керекли затла жыйылгъанларын, ветеранланы къатышыулары бла кишиликни дерслери бардырылгъанларын  айтып, ала кеслери уа къаллай болушлукъ этерге боллукъларын  соргъандыла. Виктор Дядюра: «Эм алгъа, аскерчиле аланы мында сакълагъанларын билирге керекдиле. Аны ючюн а алагъа себеплик этген биригиуле бла байламлыкъла жюрютюгюз, ветеранланы ишигизге къатышдырыгъыз,  сабийлеге насийхатчылыкъ этерге чакъырыгъыз. Бизни къоруулагъаныгъыз ючюн сау болугъуз десегиз да, хычыуун кёрюнюрюкдю»,- деп юйретгенди.   
Ахырында ветеран жаш устазлагъа ыразылыгъын билдиргенди. «Сабийлеге билим бере, аланы ариу юйрете, къыралыбызны тамблагъы кюню  иги болуруна уллу къыйын саласыз, аны ючюн аллыгъызда баш урама. Ол ишигиз бла сиз да Ата журтубузну къоруулаучуларысыз», - дегенди.