Физкультурачыны кюнюнде бизни республикада «Низамны сакълаучу бла жарау этиу» деген хайырлы жумуш тындырылгъанды, деп билдиргендиле Къабарты-Малкъарда МВД-ны пресс-службасындан.
Чегем районда ол кюнню эрттенлиги жаш спортчулада сейир башланнганды: майданнга ала бла юйретиучюле угъай, полициячыла чыкъгъандыла.
Право низамны сакълаучула гитче къауумгъа жараула бардыргъандыла. Ала да таматала кёргюзтгенни къайтарып, саулукъгъа, иги кёллюлюкге да спорт аламат себеплик этгенине тюшюннгендиле.
Акцияны къурагъанла белгилегенлерича, саулукълу жашау этиуге чакъырыу иш Къабарты-Малкъарда мындан арысында да бардырылып турлукъду. Не десенг да, быллай «спорт дерс», саулукълу, жууаплы, кючлю тёлю къурауда магъаналыды.
Терк районда уа спорт юйретиуле шахарны стадионунда ётгендиле. Ары жыйылгъан сабий къауум бла муниципалитетде ОМВД-ны Жамауат советини башчысы Людмила Шарибова, «Биринчилени атламлары» жамауат организацияны регион бёлюмюню келечилери тюбешгендиле. Ала да спорт бла кюрешиуню магъанасын туура этгендиле. Каратэден Россейни спортуну устасы Альберт Пшуков а гитчеле бла жараула бардырып, жетишимге жол биринчи гитче атламладан башланнганын чертгенди.
Къонакъла сабийлеге жоллада жюрюуню жорукъларыны юслеринден да кёп айтхандыла, тюрлю-тюрлю бузукълукъла ючюн къаллай жууаплылыкъ болгъанын да билдиргендиле. Бегирек да кибер къоркъуусузлукъгъа эс бургъандыла: Интернетде хыйлачылагъа алданмазгъа, танымагъан адамлагъа кеслерини юслеринден абери айтмазгъа, социал сетьледе аманлыкъчыланы ауларына тюшмезге юйретгендиле.
Улбашланы Мурат.