Озгъан шабат кюн бизни республиканы 240 чакълы мектебинде биринчи къонгуроу зынгырдагъанды. Эрттенликден окъуна орамлада омакъ кийиннген жашла бла къызла тюрлю-тюрлю гюл къысымлары, шарлары бла да, кёзге хычыуун кёрюне, абаданыракълагъа - кезиулю окъуу жыл, гитчечиклеге уа билимни дуниясы бла шагъырейлениу башланнганын эсгертгендиле.
Быйыл, саулай алып айтханда, 101 мингден аслам окъуучу билим аллыкъды школларыбызда. Биринчи класслагъа уа 12 минг чакълы сабий жюрюрюкдю.
Нальчикде закий поэт Александр Пушкин атлы бир-бир предметлени терен окъутхан бешинчи номерли школуну арбазында да, жарыкъ жырла эшитиле, устазла, ата-анала, биринчи классха барлыкъ жашчыкъла, къызчыкъла да жыйылгъан эдиле. Къууанчлы линейканы хурметли къонакълары уа КьМР-ни Парламентини Председатели Татьяна Егорова, жарыкъландырыу, илму эм жаш тёлюню ишлери жаны бла министрни орунбасары Ирина Шонтукова, «Кюн шахар» сабий чыгъармачылыкъ араны директоруну къуллугъун толтургъан Мурат Арипшев, тохтаусуз профессионал айныуну республикалы арасыны таматасыны орунбасары Фатима Кравцова болгъандыла.
Эм алгъа байрамны бардыргъанла гитчелеге мектепни жашаууну, дерслени, переменаланы юслеринден айтып, ызы бла келгенлени школгъа энди жюрюп башларыкъчыкъла бла танышдыргъандыла. Быйыл а аланы саны 200-ге жетеди, кеслери да алты биринчи классны къурарыкъдыла. Аланы окъутурукъ педагогланы санында уа Биттирланы Фарида (1/3 класс), Байкишиланы Индира (1/4 класс) да бардыла.
Аланы, битеу да бери жыйылгъанланы бу къууанчлы кюн бла директор Светлана Емузова алгъышлай, хар жылдан бу школгъа кёпден-кёп сабий келгенине къууаннганын да жашырмагъанды. Барысына да саулукъ-эсенлик, насып, жетишимле тежегенди.
Сёз къонакълагъа берилгенинде уа, Татьяна Борисовна бери бютюн ёхтемлик бла келгенин, ол да бу мектепни тауусханын, биринчи къонгуроу кесине урулгъан кюн бюгюнча эсинде тургъанын билдире, жюрегин хычыуун сезим бийлегенин айтханды. Сентябрь – ол жаланда окъуу жылны угъай, билимни, чыгъармачылыкъны жангы даражасына кётюрюлюуню байрамыды, дегенди. Абадан тёлю кичилени школ жашауну, анда биринчи устазларын, тенглерин, дерслерин да сюерге юйретирге борчлу болгъанын да ангылатханды. Билим алыу не заманда да къыйын, болсада хурметли иш болгъанын да, сабийлеге айланып, дагъыда эсгертип, алагъа тёзюм тилегенди.
Ол сёзлеге къонакъланы барысы да къошулгъандыла. Ирина Васильевна уа ведомстволу министрни къуллугъун толтургъан Ауес Кумыковну Билимни кюню бла алгъышлауун да эшитдиргенди.
Ызы бла уа сабий жюреклени сейир сезимлеге бёлеген чакъ - биринчи къонгуроу. Аны бла байламлы бу окъуу учрежденияда ахшы тёрени да белгилерчады. Аны мектепге энди жюрюп башларыкъчыкъла, гитче къонгуроучукъланы къолларына алып, барысы да бирге бергенлери хычыуун эди.
Школгъа киргенлеринде уа, эм алгъа аланы Къулийланы Къайсын атлы Малкъар къырал драма театрыбызны артистлери хазырлагъан сахна оюн бла къууандыргъандыла. Андан сора уа билимни дуниясына, жашырынлыкъларына жол ызларыкъ биринчи дерсле башланнгандыла.
Мокъаланы Зухура.
