Темыркъан Юрэ и цIэр зезыхьэ Къэрал концерт гъэлъэгъуапIэм япэу утыку къыщрахьащ дэфтэрхэр зи лъабжьэ «Влюбиться за один день: Нальчик» фильмыр. Режиссёрыр Ставро­поль щыщ журналист, сценарист Исаевэ Кристинэщ. Ар ягъэхьэзыращ «Туризм и гостеприимство» лъэпкъ Iуэхум хыхьэу. 

Фильмым щIидзэным и пэ къихуэу, IуэхущIапIэм и япэ къатым щагъэлъэ­гъуащ республикэм и къалащхьэм и тхыдэм теухуа сурэтхэр. КъинэмыщIауэ, абдеж утыку къыщрахьащ инженер, ­дизайнер Битокъу Владислав и архитек­турно-художественнэ макет цIыкIухэр щызэхуэхьэса «Дома, которые помнит Нальчик» выставкэр. 
Туристхэм зыщаплъыхьыну яфIэфI, щIыуэпсым и дахагъэрэ къулеигъэкIэ     бей ди щIыпIэхэр мыхъуу, лэжьыгъэм ­нэхъыбэу къыщыгъэлъэгъуэжар къалэ­дэсхэмрэ абыхэм я псэукIэмрэщ. Дакъикъэ 30 хъу лэжьыгъэм и курыхщ нал­шыкдэсхэм хьэщIэ зэрафIэфIымрэ абы пщIэ зэрыхуащIымрэ, я щэнхабзэр, лъабжьэр, тхыдэр, щIэинхэр зэрахъумэр, зыгъэпсэхупIэм зэрызиужьыр, щIыпIэми абы щыпсэухэми хуабагърэ гуапагъэрэ къазэрыпкърыкIыр.
Фильмыр тезыхахэм я мурадыр Къэ­бэрдей-Балъкъэрым и къалащхьэм и ­гъащIэр къагъэлъэгъуэжынырщ. Налшык къалэм зегъэужьынымрэ ар егъэ­фIэкIуэнымрэ махуэ къэс зи гуащIэ езы­хьэлIэ, а щыхьэрыр фIыуэ зылъагъу цIыхухэр абы куэду къыхощ. Абыхэм ящыщщ КъБР-м и Iэтащхьэ КIуэкIуэ ­Казбек, КъБР-м курортхэмрэ туризмэмкIэ и министр Быф Аскэр, къалэ адми­нистрацэм и Iэтащхьэу щыта Ахъуэхъу Таймураз, къалэм зегъэужьынымкIэ «Плат­форма» институтым и арт-координатор Аккизов Керим, художникхэр, рестораторхэр, хьэрычэтыщIэхэр, нэгъуэщI­хэри.
КIуэкIуэ Казбек фильмым къыщы­щып­салъэм къытеувыIащ щIыналъэм и са­наторнэ-курорт комплексым зегъэу­жьы­ным теухуа мурадхэм, ди щIыпIэм и да­хагъэмрэ туризмэм и лъэныкъуэкIэ иIэ Iэмалхэмрэ. 
- Журналист IэщIагъэм и фIыгъэкIэ къызэхъулIащ цIыхухэм сепсэлъылIэ­-ныр, сыдэзыхьэх гъуазджэ Iуэхуми си зэ­фIэкI сыщеплъыжыныр. Репортаж нэхъ кIэщI дыдэми зы тхыдэ хъыбар къощIыкI. ГъащIэм и къэхъугъэ щIэщыгъуэ гуэр цIыхухэм я деж зэрынэпхьэсыным сыт щыгъуи ухущIокъу. Режиссёрым и нэкIэ солъагъу Урысейм и къару нэхъыщхьэр - ар абы щыпсэу лъэпкъхэм я зэкъуэтыныгъэр зэрыарар. Къэрал дэIэпыкъуныгъэ яIэщ анэдэлъхубзэр, щэнхабзэр, лъэпкъ хабзэр зыхъумэхэм. Ар ди къэралыр нэ­гъуэщIхэм къазэрыщхьэщыкIхэм ящыщ зы Iуэхугъуэщ, - жеIэ Кристинэ. - Си лэ­жьы­гъэр зытеухуар къэщIэрэщIэжы­ныгъэмрэ цIыхубэм я зэкъуэтыныгъэм­рэщ. Къалэм щыпсэу дэтхэнэми Iэмал иIэщ ар егъэфIэкIуэным я къару ирихьэлIэну, яIэр яхъумэну, зрагъэужьыну, сабийхэм анэдэлъхубзэкIэ епсэлъэну. Къалэ зэмылIэужьыгъуэхэм - Ставро­поль, Краснодар, Пятигорск сыщыпсэуа нэужь, Налшык сыкъыщыхутащ. Мы къалэм теухуа фильм тесхыну зыкъыщыс­хуа­гъазэм, налшыкдэсхэм я зы махуэ къэзгъэлъэгъуэну мурад сщIащ. Абы ущрохьэлIэ зи IэщIагъэкIи, ныбжькIи, дэзы­хьэх­кIи, Iуэху еплъыкIэкIи зэщхьэщыкI цIыхухэм. Лэжьыгъэр къызэхъулIамэ, ар фигу дыхьамэ, си гуапэщ. 
Фильмым и афишэм къат куэду зэтет пасэрей унэхэр къызэрищым цIыхухэр щыщIэупщIэм, Кристинэ жэуап яриты­жырт ар щыпсэу фэтэрым и IуплъапIэу зэрыщытыр. Налшык гъатхэпэм къэIэпхъуа режиссёрым къалэр занщIэу игу дыхьащ. Абы зэрыжиIэмкIэ, фIагъ защIэ къэбгъэлъэгъуэныр захуагъэкъым. Ап­хуэ­дэу хъуми, Кристинэ къалэр ныкъусаныгъэншэу къелъытэ. Фильмым къы­хэщ цIыхухэм къагъэлъагъуэ Налшык ­къалэм зэрызиужьыр, совет лъэхъэнэм ­яухуа архитектурэр Iэмал зэриIэкIэ зэра­хъумар, зэманым декIу ухуэныгъэщIэхэ­ри зэримымащIэр. Аращ зэманым декIу гъащIэу къалъытэр. 
Къалэм и гъащIэм щыщ зы махуэ къыщыгъэлъэгъуэжа фильмым къызэ­щIеубыдэ пщэдджыжьыпэм къэзыжыхь, лэжьыгъэм пэрыхьэн ипэкIэ кофе ефэ, санаторэм зыщызыгъэпсэху, Iуэху куэд зэфIэзыгъэкI цIыхухэр. Апхуэдэщ зоопаркым и унафэщI, зыпэрыт Iуэхур фIыуэ зылъагъу Забаков Залым, Bazr шхапIэмрэ пасэрей хьэпшыпхэм я тыкуэнрэ зыгъэлажьэ, Налшык къалэр фIыуэ зы­лъагъу Эшиевэ Малика, нэгъуэщIхэри. 
КъыжыIапхъэщ, Исаевэ Кристинэ нэхъапэIуэкIи Кавказ Ищхъэрэм теухуа этнографие, документальнэ фильмхэр («Народы России: Наследники Ногая», «Народы России: Легенды Табасарана», «Российский Кавказ. Три века созидания», «Казаки России: Отечество, вера, традиции», «Большой Кавказ с Олегом Яновским») зэрытрихар. Абы и мурадщ мы лэжьыгъэм иджыри къыпищэу зригъэубгъуну, «Горы возможностей» зи фIэ­щыгъэ художественнэ фильмыр трихы­-ну. КъинэмыщIауэ, Кристинэ и хъуэпсапIэщ Налшык щыщ IэпщIэлъапщIэхэм я IэрыкIхэмрэ зэфIэкIхэмрэ къыщыгъэ­лъэгъуэжа лэжьыгъи игъэхьэзырыну. Режиссерым быдэу и фIэщ мэхъу кином купщIэ зэриIэр, абы цIыхухэр зэрызэкъуигъэувэфынур. 

ТЕКIУЖЬ  Заретэ.