Жыйылыугъа шахарны билим бериу департаментини къуллукъчусу Светлана Ачмизова, «Солнышко» журналны баш редактору Залина Жериштиева, Кенже, Хасания, Адиюх, Акъ-Суу, Вольный Ауул элледе тиширыу биригиулени башчылары, сабий садланы бир къауумуну таматалары, ата-анала да къатышхандыла. Аланы алгъышлай, тиширыуланы шахар советини таматасы Лидия Дигешева жыйылыу сабий садда бошдан бардырылмагъанын чертгенди. «Биз сабийлерибизни гитчеликлеринден саулукъларын сакъларгъа юйретсек, ол аланы жашау жорукълары болуп къаллыкъды», – дегенди.
Сюзюу башланырны аллында уа хычыуун жумуш тамамланнганды: тиширыуланы совети сабийлени, ата-аналаны, юйретиучюлени да араларында суратла ишлеу жаны бла къурагъан конкурсда хорлагъанла саугъаланнгандыла.
Ызы бла садда физкультурадан инструктор Инна Вишнякова, юйретиучю Светлана Тамазова, медсестра Маргарита Карсакова, попечитель советни таматасы Светлана Закереева «Сабийле бла физкультураны къалай бардырса тюздю», «Сау кюнню ичинде сабийлени къымылдаулары», «Аш-сууну айырыу – саулукълу жашаугъа элтген жол», «Сабий садны бла юйюрню саулукълу жашау бардырыргъа юйретиуде бирге ишлеу» деген докладла этгендиле.
Садха жюрюген жашчыкъланы бла къызчыкъланы бир къаууму уа юйретиучюлери бла бирге физкультурадан дайым да этип туруучу жарауларын, концерт программаларын да кёргюзтгендиле.
Тюбешиуню ахырында семинар-кенгешге къатышханла кёрген, эшитген затларыны юслеринден кеслерини оюмларын айтхандыла. 5-чи номерли сабий садны таматасы Ляна Тохова, анда ишлеген юйретиучюле да ары жюрюген къызчыкъла бла жашчыкъла саулукълу болуп ёсерча къаллай тюрлю мадарла этип тургъанларыны, быйыл жангы окъуу жыл башланнганлай а не жангы жумушла тамамларыкъларыны юслеринден билдириуле этгендиле.
Лидия Дигешева уа сабий садны таматасына ишни къурай билгени, сабийле не жаны бла да тынгылы айнырларына къайгъыргъаны, ала ана тиллерин билирлерине аслам эс бургъаны ючюн ыспас этгенди эмда садикге саугъагъа уллу сурат бергенди.
Холаланы Марзият.
