Налшык и «Искож» хьэблэм, Щэнхабзэ зыужьыныгъэмкIэ центрым, щагъэлъагъуэ «Моя планета. Природа. Люди. Путешествия» выставкэр. Ар къызэригъэпэщащ Урысейм и «Моя планета» телеканалым.

 Сурэтхэм къыщыгъэлъэгъуащ дунейм и щIыпIэ нэхъ дахэхэр, Къэбэрдей-Балъкъэрым щытрахари къызэщIаубыдэу. Абы хагъэхьащ дуней псом щытраха, зэпеуэм нэхъыфIу къыщалъыта сурэт нэхъыфI 25-рэ. ЩIыпIэ дахэхэмрэ мэзхэм щIэс псэущхьэхэмрэ къадэкIуэу, сурэтхэм щыдолъагъу лъэпкъхэм я щэнхабзэмрэ хабзэ дахэхэмрэ.

 Гъэлъэгъуэныгъэм хагъэхьа, ди щIыналъэр къызэрыщ сурэтхэм ящыщщ Кармаевэ Евгение и «Iуащхьэмахуэ», Шатровэ Ольгэ и «Джилы-Су» лэжьыгъэхэр. Выставкэр къызэзыгъэпэщахэм фрагъэблагъэ дунейм и щIыпIэ нэхъ дахэу къалъытэхэм зэпэIэщIэу зыщыфплъыхьыну. Апхуэдэщ пщэдджыжь дыгъэр зытепсэ Куэнгэ псыежэхыр, Ингушетием и бгы уардэхэр, Камчаткэм щыпсэу лъэпкъхэм я  къафэхэр, Алчак щIыпIэм и дыгъэ къухьэжыгъуэр, вымпIухэм я  гъащIэр, нэгъуэщIхэр къыщыгъэлъэгъуа лэжьыгъэхэр. 

  Центрым и унафэщI Жаным Саидэ къыхигъэщащ Налшык къалэм щыпсэухэмрэ ди хьэщIэхэмрэ я дежкIэ мы гъэлъэгъуэныгъэр мыхьэнэ зиIэ щэнхабзэ Iуэху дахэу зэрыщытыр. «Моя планета» телеканалым абы фIыщIэ хуищIащ дуней псом, ди щIыналъэм я щIыпIэ дахэхэр щызэхуэхьэса мы сурэтхэр республикэм исхэмрэ ди хьэщIэхэмрэ тыгъэ къазэрыхуищIам папщIэ.

«Моя планета» телеканалым балигъхэми ныбжьыщIэхэми яхуэгъэзауэ егъэхьэзыр дыкъэзыухъуреихь дунейм, хьэршым, тхыдэм я щэхухэм,  дунейм тет лъэпкъхэм, щIыналъэхэм ятеухуа нэтын щхьэпэхэр.

 Гъэлъэгъуэныгъэр къызэзыгъэпэщахэм къыхагъэщащ зэпеуэщIэ шыщхьэуIум и кIэхэм зэрырагъэкIуэкIынур икIи абы сурэттех Iэзэхэри а Iуэхум дихьэххэри я зэфIэкI щеплъыж зэрыхъунур. Зэхьэзэхуэм теухуа хъыбархэм зыщыхэвгъэгъуэзэфынущ «Моя планета» телеканалым и сайтымрэ Интернет сайтхэм щиIэ напэкIуэцIхэмрэ.

 «Моя планета» телеканалым и редактор нэхъыщхьэ Лобашев Роман выставкэм зыкърезыгъэхьэлIахэм захуегъазэ гъэлъэгъуэныгъэр къэралым и щIыпIэ зэмылIэужьыгъуэхэм, Къэбэрдей-Балъкъэрри хыхьэу, зэрыщагъэлъагъуэм гукъыдэж къызэрыритым теухуа тхыгъэкIэ.

 - Къэбэрдей-Балъкъэрыр Урысейм и щIыналъэ нэхъ дахэхэм ящыщщ икIи абы щыпсэу лъэпкъхэм хьэщIэ фIыуэ ялъагъу, пщIэ хуащI. Иджырей ди выставкэм щыдогъэлъагъуэ ди лэжьакIуэхэм псом хуэмыдэу щIыуэпсыр щыкъулей Iуащхьэмахуэ уардэмрэ гур зыхьэху Джилы-Сурэ мы гъэм щытраха сурэт щIэщыгъуэхэр, - жиIащ Лобашев Роман. – Ди выставкэр нэгъуэщIхэм къазэрыщхьэщыкIыр щIыуэпсыр, цIыхухэр, хабзэхэр хэдухуанэурэ дуней псом и теплъэр къызэрыдгъэлъагъуэрщ.

Гъэлъэгъуэныгъэр шыщхьэуIум и 3-м щыщIэдзауэ жэпуэгъуэм и 3 пщIондэ Щэнхабзэ зыужьыныгъэмкIэ центрым щекIуэкIынущ.

ТЕКIУЖЬ Заретэ.