Черек районну администрациясыны башчысы Къулбайланы Алан бардыргъан кезиулю муниципал сагъатда кир-кипчикни кетериуге эмда суу бла жалчытыугъа энчи эс бурулгъанды.
- Кир-кипчикни заманында кетериуге эмда элледе тазалыкъны сакълаугъа дайым кёз-къулакъ болгъанлай турабыз. Къалгъан-къулгъанланы кетериуню кюнлери тохташдырылгъандыла. Андан сора да, хар элде ол ишге жууаплы болгъан адамла белгиленнгендиле. Уллу къалгъан-къулгъанланы къотарыр жерни да хазырлауну къайгъысын эте турабыз. Аллай затла ыйыкъдан бир кере чыгъарыллыкъдыла. Былайда чертип айтыргъа тийишли кёреме, ол майданлагъа жаланда уллу къалгъан-къулгъан затла тёгюллюкдюле,- деп эсгертгенди Къулбай улу.
Суу бла жалчытыу не халда болгъаныны юсюнден а «Черексервисни» башчысы Гузойланы Аслан билдириу этенди. Ол айтханнга кёре, Зарагиж элде суу бла жалчытхан тёртюнчю скважина ишлеп башлагъанды, алай эсе уа, эллиле суу жетишмей къыйналлыкъ тюйюлдюле.
- Аны бла да тохтап къаллыкъ тюйюлбюз. Бусагъатда специалистле суу быргъыланы халларын тинте турадыла, хар затха да тынгылы къарайдыла. Бизни борчубуз – хар юйюге не заманда да таза суу келирча этиудю. Ол жаны бла ишле андан ары бардырыладыла. Биз районну къайсы элинде жашагъанла бла да къаты байламлыкъ жюрютебиз эмда аланы жарсыуларына мычымай эс бурабыз, - дегенди Гузойланы Аслан, деп билдиргендиле бизге районну администрациясыны пресс-службасындан.
ДАЛХАТЛАНЫ Марзият.
