Физкультурникым и махуэм ирихьэлIэу, КъБР-м и Iэтащхьэ КIуэкIуэ Казбек хуэзащ Урысейм бэнэкIэ зэ­мы­лIэужьыгъуэхэмкIэ и пелуан Емельяненкэ Александррэ Шэшэн Республикэм и УнафэщIым и лIыкIуэу Къэбэрдей-Балъкъэрым щыIэ Баташев Алвиррэ. 

ЗэIущIахэр тепсэлъыхьащ щIыналъэ­хэм я зэпыщIэныгъэхэр нэхъ быдэ щIын, цIыхубэр спортым нэхъ дегъэхьэхын, бэнэкIэ щхьэхуэхэм зегъэужьын зэры­­­-хуейм. КIуэкIуэ Казбек хьэщIэм ехъуэ­хъуащ ди республикэм щрихьэкIыну зэманыр гукъинэж щыхъуну, и IэщIагъэм ехъулIэныгъэ щиIэну, и мурадхэр къе­хъулIэну. 
Узыншагъэм и дежкIэ спортымрэ физкультурэмрэ я мыхьэнэр зэрыиныр ягу къигъэкIыжу, республикэм и Iэтащхьэр цIыхухэм махуэшхуэмкIэ ехъуэхъуащ. 
«Нобэ ди къэралым щагъэлъапIэ Физкультурникым и махуэр, - иритхащ КIуэ­кIуэ Казбек и напэкIуэцIым. - Физкультурэмрэ спортымрэ IэщIагъэ зыхуэхъуа спортсменхэмрэ спортым и ветеранхэмрэ нэмыщI, ар Iэпкълъэпкъым зегъэу­жьы­ныр езыхэм я гукъыдэжкIэ къыхэзыха псоми я урысейпсо махуэшхуэщ. 
Къэбэрдей-Балъкъэрыр спортым бы­дэу пыщIа, а лъэныкъуэм ехъулIэныгъэ куэд щызэзыгъэгъуэта республикэщ. Урысейм и утыкухэми дунейпсо зэхьэ­зэхуэхэми текIуэныгъэ лъагэхэр щызы­Iэрызыгъэхьэ и спортсмен щэджащэ­хэмрэ тренерхэмрэ ирогушхуэ ди щIыналъэр.
Гухэхъуэщ Къэбэрдей-Балъкъэрым щып­сэу псоми спортым пщIэ зэрыхуа­щIыр. ЦIыху куэдым, физкультурэм дихьэхауэ, я узыншагъэр ирагъэфIакIуэ, сабийхэм щапхъэ яхуэхъурэ абыхэм я ­Iэпкълъэпкъ гъэсэныгъэм зрагъэужьу. Спортыр хьэлщ, тегушхуэныгъэщ, жаныгъэщ, ар икIи текIуэныгъэм ухуэзышэ гуп зэкъуэтыныгъэщ. 
Иужьрей зэманым дэ гулъытэшхуэ ­худощI спорт инфраструктурэм зедгъэу­жьыным: школхэм спортзалхэр къы­щызэIудох, топджэгу губгъуэхэр, зыгъэсапIэ инхэр, уэрам джэгупIэхэр, лъакъуэ­рыгъажэхэм папщIэ лъагъуэхэр, зыгъэпскIыпIэхэр зыдогъэпэщ. Уеблэмэ мыл уардэунэрэ иджырей бэнэкIитхумкIэ ­центррэ диIэщ. Абы и фIыгъэкIэ, республикэм зыщаужь щIэуэ къэплъытэ хъуну спорт къудамэхэм: хоккейм, фигурнэу къэжыхьыным, фехтованэм, есыныгъэм, къинэмыщIхэм. 
Республикэм къоблагъэ ди бэнакIуэ щIалэхэм, гимнастхэм, легкоатлетхэм, топджэгухэм, баскетболистхэм, есынкIэ Iэзэхэм уащыгугъ зэрыхъунур зылъагъу спортсмен цIэрыIуэхэр икIи ныбжьы­щIэхэр ягъэгушхуэ. 
ДыкъэувыIэну ди мурадкъым, сыту жыпIэмэ, спорт и лъэныкъуэкIэ ипэкIэ кIуэтэнри, ар къагъэсэбэпурэ я узыншагъэм зрагъэужьынри ди цIыхухэм кIуэ пэтми нэхъ тыншу къаIэрыхьэу хъун ­хуейщ. 
Физкультурникым и махуэр зыгъэлъапIэ псоми гукъыдэж, тегушхуэныгъэ, узыншагъэ быдэ, ехъулIэныгъэрэ фIы­гъуэ куэдрэ фиIэну гурэ псэкIэ сыныво­хъуэхъу!»