«Спартак-Налшык» (На­л­шык) - «Ростов-2» (Дон Iус Ростов) - 0:3 (0:1). Налшык. «Спартак» республикэ стадион. ШыщхьэуIум и 8-м. ЦIыху 648-рэ еп­лъащ. 
Судьяхэр Поляничкэ (Смоленск), Афонин, Бэ­хъус (тIури Краснодар щыщщ), 
«Спартак-Налшык»: ­Къумыкъу, КIэдыкIуей, Пириев, Тут (Селяев, 69), Гъуэгузокъуэ, Пекъу (Малкандуев, 69), ХьэцIыкIу (Жабоев, 77), Хьэшыр (Iэпщацэ, 69), Черкесов, Ибрагимов, Лысенкэ (ЛIуп, 60).
«Ростов-2»: Рязанов, Ковальков, Колючкин, Бабакин, Жуков М., Шерматов (Грозовский, 88), Амосов, Михайлов (Зубенкэ, 46), Жуков Р. (Логвиненкэ, 90), Чебураков, Каспарян (Шанталий, 65).
Топхэр дагъэкIащ: Жуков Р., 23 (0:I). Колючки­ным, 65 (0:2). Чебураковым, 87 (0:3). 
Дагъуэ къыхуащIащ: ­Гъуэгузокъуэм, Ковальковым, Шерматовым.
Джэгум къыхахуащ: Гъуэ­гузокъуэр (90-нэ дакъи­къэм).
Урысей Федерацэм фу­т­болымкIэ и етIуанэ лигэм и «Б» дивизионым и Япэ гу­пым мы гъэм щекIуэкI зэ­хьэзэхуэм и иужьрей джэгугъуитхум «Спартак-Налшыкым» къыщыдита дэ­рэжэгъуэр щэбэт кIуам къы­зэпыудащ. Ди щIалэхэр бжыгъэшхуэкIэ къыхагъэ­щIащ Дон Iус Ростов къикIахэм.
«Ростов-2»-р зэрыхьэрхуэрэгъу лъэщыр, дауи, гу­ры­Iуэгъуэт. Ауэ сытми, зэ­рымыщIэкIэ, ар зэхьэ­зэ­хуэм щыпашэхэм ящыщ зыуэ щыттэкъым икIи ищ­хьэкIэ кIуэтэну хущIэкъухэм хабжэ. Арами, дыщыгугъырт, иужь зэIущIэхэм ды­зыгъэгуфIэ, зэпеуэм щыпашэ «Севастополь»-ри яхэ­ту я ныкъуэкъуэгъу зыбжанэ хэзыгъэщIа, «Спартак-Налшыкыр» абыи хуэ­фэщэну пэщIэтыну. Ди жагъуэ зэрыхъущи, дыкъэп­цIащ.
Джэгум и къыщIэдзэкIэм уимыгъэпIейтейнкIэ Iэмал иIэтэкъым. Ди щIалэхэм я ебгъэрыкIуэныгъэхэм хьэ­щIэ­хэм нэхъ лъэщыж къыпагъэувыжырт. Ар фIыкIэ зэримыухынур гурыIуэ­гъуэт. Апхуэдэуи къэхъуащ 23-нэ дакъикъэм, Жуков Ринат «Ростов-«-р япэ щригъэщам. 
Дауи, налшыкдэсхэр хущIэкъуащ щытыкIэр ягъэ­зэкIуэжыну икIи абы папщIэ икъукIэ гугъу зрагъэ­хьащ. АрщхьэкIэ, хьэщIэ­хэм апхуэдизу лъэщу зы­­къагъэбыдати, зы Iэмали къратакъым топ дагъэ­кIыну. 
Загъэпсэхуу къихьэжа иужькIи Iуэхум зэрызихъуэжа щыIэкъым. «Спартак-Налшыкыр» ерыщу къа­руушхуэкIэ ебгъэрыкIуэну ху­щIэкъурт, «Ростов-2»-м узы­гъэгужьей жэуапхэр щIэх­-щIэхыурэ къритырт. 
ХьэщIэхэм я гъуащхьэхъу­мэ Колючкин Никитэ 65-нэ дакъикъэм етIуанэ топри къы­щытхудигъэкIам гуры­Iэ­гъуэ хъуащ зэIущIэм ­кърикIуэнур. 0:2-р мып­хуэдэ зэIущIэхэм узыпэмы­лъэ­щы­жынут.
«Спартак-Налшыкым» и тренер нэхъыщхьэ Емкъуж Мурат занщIэу цIыхуищ ­ихъуэжами къикIыща щыIэкъым. Уеблэмэ, нэхъыкIэж хъуащ – 87-нэ дакъикъэм бжыгъэр 0:3-м нэсащ. А псом ищIыIужкIэ судьям, етIуа­нэу дагъуэ къыхуищI­ри, Гъуэгузокъуэ Андемыр джэгум къыхихуащ.
СлIожь, фIы псоми зэгуэр еух. Иухащ мазэрэ ныкъуэкIэ ди щIалэхэм ды­зэрагъэгуфIа лъэхъэнэр. Псалъэм къыдэкIуэу къы­хэдгъэщынщи, «Спартак-Налшыкым» и иужьрей ехъу­лIэныгъэхэм я фIыгъэкIэ абыхэм я джэгукIэм еп­лъыну стадионым къе­кIуа­лIэхэм хуэдищкIэ хэ­хъуат. Дыщыгугъынщ, зэ зэ­рылъэпэрэпам, «Спартак-Налшыкыр» уанэгум къримыгъэхуну икIи дяпэ­кIи дэрэжэгъуэ къыдиты­ным пищэну.
Джэгугъуэ блэкIам пашэхэм ящыщу текIуэныгъэ зы­Iэрызыгъэхьар «Ростов-2­»-м и закъуэкъым. Ар зэ­ры­зылъэщIи­мыгъэ­хьэ­ны­м хущIокъу Хасавюрт щыIэу щIыпIэ «Победа»-м ефIэкIа бжьыпэр зыIыгъ «Се­вастополь»-р. Абыхэм япэгъунэгъу дыдэщ Мейкъуапэ кIуауэ «Дружба»-р хэзыгъэ­щIа Донецк и «Шахтёр»-р. Яужь къитхэм очкоибгъукIэ зэращхьэщыкIар къэплъы­тэмэ, а командищращ, дауи, мыгъэрей зэхьэзэхуэм и япэ увыпIэм адэкIэ щIэ­бэнынур. 
Иджы щыгъуазэ фы­хуэтщIынщ Урысей Федерацэм футболымкIэ и етIуанэ лигэм и «Б» дивизионым и Япэ гупым щекIуэкI зэхьэзэхуэм и зи чэзу джэгугъуэм кърикIуа бжыгъэхэм. Мис ахэр: «Ангушт»­ (Нэзрэн) - «Заря» (Луганск) – 0:0, «Нефтяник» (Избербаш) – «Кызылташ» (Бахъчисарай) - 1:6, «Дружба» (Мейкъуапэ) – «Шахтёр» (Донецк) – 1:2, «Победа» (Хасавюрт) - «Севасто­поль»­ (Севастополь) – 1:3, «Динамо-2» (Мэхъэчкъалэ) – «Рубин» (Ялта) - 1:1, «Нарт» (Черкесск) - «Чайка-М» (Песчанокопскэ) – 2:0. 
КъыкIэлъыкIуэ джэгу­гъуэр «Спартак-Налшы­кым» Урысей Федерацэм и кубокыр къэхьыным ипкъ иткIэ зэхаубла зэхьэзэхуэм щригъэкIуэкIынущ. Шыщ­хьэуIум и 13-м абы и стадионым къыщригъэблэгъэнущ Владикавказ и «Ала­ния­»-р. Ар «Матч ТВ» къэ­рал­псо телеканалым къ­ы­щигъэлъэгъуэнущ сы­хьэт 16-рэ дакъикъэ 45-м щыщIэдзауэ.
Хьэтау Ислъам.