КъБКъУ-м и медицинэ академием щекIуэкIащ лышх узыфэм, ар зыпкърыт сымаджэхэм ягъуэтын хуей дэIэпыкъуныгъэм теухуа япэ щIыналъэзэхуаку щIэ­ныгъэ-практикэ конференцэ. Абы хэтащ Кавказ Ищхъэрэм хыхьэ щIыналъэхэм, Санкт-Петербург, Тбилиси къикIа онкологхэр, радиологхэр, реабилитолог­хэр, щIэ­ныгъэлIхэр. 

КъБКъУ-м щIэныгъэ-къэхутэныгъэ лэжьыгъэхэмкIэ и проректор, ЩIэныгъэхэмкIэ урысей академием хэт Хьэшыр Светланэ зэIущIэр къыщызэIуихым къыхигъэщащ лышх узыфэр зыпкърыт сымаджэхэм еIэзэным, абыхэм я узыншагъэр зэфIэгъэувэжыным бгъэдыхьэкIэ щхьэхуэ иIэн ­папщIэ, медицинэм и IэщIагъэлI зэ­хуэ­мыдэхэр зыхэт зэIущIэм мыхьэнэшхуэ зэриIэр.
«Терапевтхэр, хирургхэр, реабилитологхэр зэгъусэу унэ­тIыныгъэм щыIэ гугъуехьхэм зэрытепсэлъыхьым хэ­кIы­пIэ­щIэхэр къигъэнэIуэнущ. Апхуэдэ бгъэдыхьэкIэр лъэпкъ проектхэм къагъэув къалэнхэми поджэж. Нэхъыщхьэр ­сымаджэм и узыншагъэр зэтеувэжыху игъуэт дэIэпыкъу­ныгъэрщ: абы еIэзэным деж щегъэжьауэ ­гукъыдэж иIэу жылагъуэм хэзэгъэжыным нэсыху гулъытэ хуэщIынырщ. Шэч къытесхьэркъым, зэфIэкI пэ­рытхэмкIэ зэхъуэжэныр узым текIуэнымкIэ хэлъхьэныгъэфI зэрыхуэхъунум», - жиIащ Хьэшыр Светланэ.
КъБР-м узыншагъэр хъумэнымкIэ и министр Къалэ­батэ Рустам хьэщIэхэм зэрызахуигъазэм къеджащ абы и къуэ­дзэ Хьэщхъуэжь Борис. 
«Онкологие IэнатIэм нобэ щызэфIагъэкIыр узыр къэ­хутэнымрэ ар зыпкърытым еIэзэнымрэ и закъуэкъым, атIэ сымаджэм къыпэщылъ Iуэху псори зэфIэкIыху дэ­щIыгъущ. Апхуэдэ бгъэдыхьэкIэм щытыкIэр нэхъ тынш къащещI. ЩIыналъэм IэнатIэм и инфраструктурэм зыщыдогъэужь, иджырей мардэхэр лэжьыгъэм къыхыдогъэхьэ. Ауэ ме­дицинэм гъунапкъэ иIэкъым, абы къы­хэкIыуи зэфIэкIхэм­-кIэ зэхъуэжэныр Iуэхур ипэкIэ зыгъэкIуатэ Iэмал хъарзынэщ. Шэч къытесхьэркъым ­конференцым къыщаIэтахэм япкъ иткIэ къащта уна­фэхэр къэралым онкологие дэIэпыкъу­ныгъэм зыщиу­жьынымкIэ хэлъхьэныгъэфI зэрыхъунум», - щыжеIэ министрым и зэрызыхуигъазэм. 
КъБР-м Узыншагъэр хъумэнымкIэ и министерствэм штатым хэмыт и IэщIагъэлI-онколог АфIэунэ Мухьэмэд теп­сэ­лъыхьащ Къэбэрдей-Балъкъэрым и онкологие ­IэнатIэм щыщыIэ щытыкIэм. Абы къыхигъэщащ республикэм Лышх узыфэхэр зыпкърытхэм щеIэзэ и диспансерым инф­раструктурэ лъэщ зэриIэр, блэкIа илъэ­сым фIагъ зиIэ дэIэпыкъуныгъэ зыгъуэтахэм я бжыгъэм зэрыхэхъуар, иджырей диагностикэ Iэмэпсымэхэм я фIыгъэкIэ иджы узыфэхэр нэхъ псынщIэу и чэзум къа­зэрыхуэхутэр. Апхуэ­дэу АфIэунэм жиIащ республикэм мыгувэу Лышх узыфэр зыпкърытхэм щеIэзэ сымаджэ­щым и унэщIэ къызэ­ры­щызэIуахынур. 
АдэкIэ конференцым и лэжьыгъэр ирагъэкIуэкIащ «стIол хъурей» жыпхъэм иту. Зэхыхьэм хэтхэр теп­сэ­лъыхьащ ­сабий онкологием, узыр и чэзум къэхутэнымкIэ, абы зэрызиубгъум упэщIэтынымкIэ щыIэ Iэмалы­щIэ­хэм.
IэщIагъэлIхэм и гугъу ящIащ ПЭТ-КТ-мрэ ОФЭКТ-КТ-мрэ къызэрагъэсэбэп щIыкIэхэм, МРТ, УЗИ къэхутэныгъэхэм, дерматоскопием и бгъэдыхьэкIэщIэхэм хэлъ щхьэхуэныгъэхэри зэпкърахащ. Къыхагъэщащ сы­маджэхэм я узыншагъэр зэфIагъэувэжын папщIэ Налшык курортым и щIыуэпс хущхъуэхэр къызэрагъэ­сэ­бэпыфынум. Апхуэдэуи сымаджэщхэмрэ реабилитацэ центрхэмрэ я зэдэлэжьэ­ныгъэм зэрызрагъэубгъунури яубзыхуащ.
IэщIагъэлIхэм я мурадщ зэхыхьэм къыхаха чэнджэщ­хэмрэ лэжьыгъэ и пIалъэ къащIахэмрэ Кавказ ­Ищхъэрэм медицинэ дэIэпыкъуныгъэр щегъэфIэ­кIуэ­ным хуэунэтIауэ я IэнатIэхэм къыщагъэсэбэпыну. Конференцэм хэтахэм сертификатхэр иратащ.

ЩхьэщэмыщI  Изэ.