– Атабызны айтханы бла Прохладныйде эл мюлк техникумну механизаторланы хазырлагъан бёлюмюне киргенме. Болсада жюрегим окъуудан эсе ишге бегирек тартханы ючюн урунууну сайлайма. Алай бла, аскерден къайтханымдан сора, Тырныауузда Мызыланы Далхат башчылыкъ этген «Шахтастрой» биригиуде цемент ташыгъан машинада ишлеп башлагъанма, – дейди Къаншаубий.
Ол айтханнга кёре, жыйырма алты жыл мындан алгъа, сабийлени окъургъа кирир заманлары жетгенде, юйюр Нальчикге кёчеди да, жангыдан иш излерге тюшеди. Насыпха, шуёху Гергъокъланы Халим кеси прораб болгъан «ДСК» комбинатны бетон этген заводуна башчылыкъ этерге чакъырады. Къаншаубийни ол жаны бла ангылауу болгъаны себепли, ишни жетишимли бардырады. Бетон ташыгъан эки эскирек машина да алып, аланы да ишлетеди. Болсада бир ауукъ замандан ауруп, ишни къоярча болады.
– Бусагъатда Нальчикде Биттирланы Алим башчылыкъ этген бетон заводда водитель болуп ишлейме. Камазда жангыракъ миксерим барды, ол манга баш кечиндирирге жетеди. Арт заманда кёп фатарлы юйлени къурулушлары бираз селейгенди, аны себепли бетонну асламысында энчи иелилеге ташыйма. Республиканы къалайына да барыргъа угъай демейме, жаланда тёш жерледе бетон жолгъа тёгюлмезча, айтып, азыракъ элтеме, – деп къошады Бачи улу.
Ушакъ нёгерибиз ишден бош заманында суу боюнунда солургъа сюеди. Кеси да айтхылыкъ чабакъчыды. Бютюнда тау ауузлада череклени иги биледи. «Нёгерлерим бла табийгъатха чыкъгъан такъыйкъаланы бек багъалайма. Чабакъ тутуугъа уа акъылбалыкъ заманымда окъуна берилгенме. Уллу къарындашым Жабраил (жаннет ахлусу болсун) юйретген эди. Чабакъ тутханда бла аны ашагъанда, заман тохтайды, дейдиле чабакъчыла. Аны себепли экисинде да, ашыкъмай, асыулукъ табаргъа керекди», – деп къошады ушакъ нёгерибиз.
Къаншаубий юй бийчеси Сарбашланы Ануарны къызы Баблина бла эки къыз ёсдюргендиле, алагъа бийик билим да алдыргъандыла. Алёна бла Азиза эрдедиле, Москвада банкда ишлейдиле. Юч туудукълары барды – эки жаш бла бир къыз. Огъурлу аппа бла амма алагъа къууана жашагъанларын эмда къонакъгъа келирлерин ашыгъып сакълагъанларын букъдурмайдыла.
Курданланы Сулейман.
