Къабарты-Малкъарда сабанлада будай эмда арпа оруу ишле ахыр кезиуюне жетгендиле. Бюгюнлюкде 260 минг тонна чакълы мирзеу жыйылгъанды. Ол кеси да былтырдан асламды, деп айтылады КъМР-ни Башчысыны Администрациясыны МАХ-да каналында.
Жаулу битимлени оруу а рапсны жыйыу бла бошалгъанды. Эл мюлкде къармашханла быйыл аны эки кереге кёп жерде ёсдюргендиле, ол а 10 минг гектардан артыкъ болгъанды. Андан ала 23 минг тоннадан аслам алгъандыла.
Мирзеулюк битимле быйыл 70 минг гектарда ёседиле – хар  гектардан 38 центнер алыннганды. Ол санда 45,6 минг гектарда ёсген  кюзлюк будайны  тирлиги  орта эсеп бла 37,2 центнерге жетгенди.
Жайны ахыр айы башланнганы бла бахчалада алма, кертме, эрик да бишип тебирегендиле. Наныкъ, дугъум, юркюн окъуна жетгендиле. Мюлкледе дагъыда наша, бадыражан, татлы чибижи, быхы, кабачок жыйыу тири барады. Консерва заводла жемишлени  жарашдырыу бла  кюрешедиле, бюгюнлюкге аладан 54 миллиондан артыкъ условный банка чыгъаргъандыла.
Эл мюлкде уруннганла хар не бла да жалчытылыпдыла, ишлеринде бир тюрлю тыйгъыч жокъду, тирликни барысын да белгиленнген кезиуде бошаргъа таукелдиле.
«Саулай айтханда, быйылны биринчи жарымында 19,5 миллиард сом багъасы эл мюлк продукция чыгъарылгъанды. Ол а былтырны тийишли кезиуюнден асламды», - дегенди Казбек Коков.

Улбашланы Мурат.