Газетибиз КъМКъУ-ну Минги тауну тийресинде окъуу-илму арасына «Университет сменала» федерал проектни чеклеринде бу жол Луганск Халкъ Республикадан жюзден аслам школчу келгенин билдирген эди. Бу кюнледе уа сменагъа къатышхан сабийлеге РФ-ни илму эмда бийик билим бериу министрини орунбасары Ольга Петрова  эмда университетибизни экономикалы эмда стратегиялы айныу жаны бла проректору Аслан Пшигошев бла онлайн халда тюбешиу да къуралгъанды.

Сабийле бла сёлеше, Ольга Петрова быйыл проектге энди беш жыл толгъанын да билдиргенди. Ол заманны ичинде «Университет сменала» окъуучуланы бийик билим  бериу къалай къуралгъаны, усталыкъланы энчиликлери бла шагъырейлендириуде магъаналы майдан болуп къалгъанын да белгилегенди. 
- Беш жылны ичинде этилген ишни  эсеплерин чыгъарыргъа эмда  окъуучуланы сменада тургъан он кюнлери алагъа не бла къыйматлы болгъанын ангыларгъа да болады. Сабийлени кёбюсю университет бла шагъырейленнгенинден арысында, кеслерине усталыкъны, аны эбин ангылап, ол халда сайлайдыла эмда къайда билим аллыкъларын да алгъадан биледиле, - деп чертгенди Ольга Петрова.
Министрни орунбасары, андан сора да, программагъа  тири халда къатышыуну магъанасына да эс бургъанды. Окъуучула билим бериу ызланы билип, аланы юслеринден преподавательлеге соруула берирге, сайларыкъ усталыкъларына къалай эм къайда онг чыкъгъанын да ахшы амалгъа санагъанды.
Аслан Пшигошев да сменагъа къатышханлагъа илхам эмда тирилик тилегенди. Ол бюгюннгю жаш тёлю, жаланда университетлени неда жашагъан регионларыны угъай, саулайда къыралны айныууна къошумчулукъ этериклерин айтханды. Кеслерини хунерлерин бюгюнлюкде башха-башха проектледе сынагъан эмда ачыкълагъан жашла бла къызла бир ненча жылдан бюгюннгю Россейни келир заманда айныу жолларын белгилериклерин чертгенди.