Къэбэрдей-Балъкъэрым гъэмахуэ зыгъэпсэхугъуэр, узыншагъэм кIэлъыплъыныр зэрыщекIуэкIымкIэ цIыхухэм ядэгуэшащ КъБР-м и Iэтащхьэ КIуэкIуэ Казбек:
«Республикэм и лагерхэмрэ зыгъэпсэхупIэхэмрэ сабий мини 6,5-м щIигъум зыщагъэпсэхуащ мы гъэм, - етх Iэтащхьэм. – КъинэмыщIауэ, фIагъ и лъэныкъуэкIэ зыми хуумыгъэдэфыну «Радуга» зыгъэпсэхупIэм сабий 1507-м я узыншагъэм щыкIэлъагъэплъащ, абыхэм зи адэ-анэхэр зи гъусахэри яхэтщ.
Зэман дэкIмэ, республикэм къашэнущ ДНР, ЛНР щIыналъэхэм щыщ школакIуэ 1600-рэ, абыхэм Iуащхьэмахуэ лъапэ зыщагъэпсэхунущ, я узыншагъэми щыкIэлъагъэплъынущ.
Адрейхэм япэ ирагъэщу, зыгъэпсэхупIэхэм кIуэн хуитыныгъэр дзэ Iуэху хэхам хэтхэм я бынхэмрэ льготэ зиIэ унагъуэхэмрэ лъагъэс.
КъинэмыщIауэ, профучётым щыт сабийхэм папщIэ, «Атажукино» лагерым зыгъэпсэхугъуэ пIалъитI щызэрагъэпэщащ.
А Iуэху щхьэпэр ирагъэкIуэкI Лэжьыгъэмрэ цIыхухэм социальнэ и лъэныкъуэкIэ ядэIэпыкъунымкIэ министерствэм, КъБР-м щыIэ МВД-м и къудамэм, «Пэрытхэр» зэгухьэныгъэм.
Мы гъэм гъэсэныгъэми гулъытэ нэхъ хуащIащ. Ди къэралым хабзэ зэрыщыхъуам хуэдэу, лагерхэм пщэдджыжь линейкэр Урысейм и гимнымкIэ къызэIуах. НыбжьыщIэхэр хэкупсэ акцэхэм, дзэ-спорт джэгухэм хэтщ, цIыху гъэщIэгъуэнхэм яхуозэ.
Шэч къытесхьэркъым гъэмахуэр сабийхэм я гум фIыкIэ къызэринэнум, ныбжьэгъущIэхэр къагъуэтауэ, я гум гуфIэгъуэкIэ зигъэнщIауэ, гъэ еджэгъуэщIэм щIадзэжын хуэдэу».
