КъМР-ни Парламентини Билим бериу, илму эм жаш тёлюню ишлери жаны бла комитети кезиулю жыйылыуун Прохладна районну Заречное элини орта школунда бардыргъанды. Депутатла КъМР-де окъуучуланы саны аз болгъан мектепледе тюбеген кемчиликлени бла чырмауланы сюзгендие. Кенгешге жууаплы министерстволаны бла ведомстволаны, жер-жерли самоуправление органланы келечилери да къатышхандыла.
Кенгешни ача, комитетни башчысы Нина Емузова окъуучулары аз болгъан школла бла шагъырейлениу алада кемчиликлени, жарсыуланы ичинден билирге, кёрюрге онг бергенин чертгенди:
-Сабийлени элде, уллу шахарда туугъанларына да къарамай, билим алыргъа тенг онглары болургъа керекдиле. Бюгюнлюкде уа школлада окъуучуланы саны эсге алынмайды, барысына да излемле бирдиле, - деп, ол болумну тынгылы сюзюп, кемчиликлени ачыкъларгъа, аланы кетериуню жолларын белгилерге чакъыргъанды.
Комитетни башчысы окъуучулары аз болгъан школлада иги жанын да белгилегенди – устазны хар окъуучу бла энчи ишлерге, эс бёлюрге заманы барды. Алай, жарсыугъа, экзаменлени бералмай, аттестатсыз къалгъан кезиуле да тюбейдиле.
Прохладна районну администрациясыны таматасы Андрей Журавлёв къонакълагъа ыспас этгенди, билим бериу учрежденияланы ишлерине чырмау этген сылтауланы кетериуню мадарлары табыллыкъларына ышаннганын да билдиргенди. «Устазлагъа да, ала къаллай школда ишлегенлерине да къарамай, тенг амалла жалчытыргъа керекдиле. Ол санда айлыкъ, ырысхы-техника амалла да бирча болургъа тийишлидиле»,-деп къошханды ол.
Белгиленнген теманы юсюнден КъМР-ни жарыкъландырыу, илму эм жаш тёлюню ишлери жаны бла министрини орунбасары Ирина Шонтукова доклад этгенди. Ол билдиргенича, республикада окъуучулары аз санлы 32 школ барды, алада 3042 сабий окъуйду, устазла уа 560-ха жетедиле. Хар муниципалитетде да болум башха тюрлюдю. Алай кемчиликлени асламы уа устазланы айлыкълары тенг болмагъаны, бир адам эки эм андан кёп дерсни бардыргъаны бла байламлыдыла. Ол устазла билимлерин ёсдюргенлерин, жангы усталыкъла алгъанларын, алай бла уа бир ненча дерсден окъутургъа эркинликлери болгъанларынын да айтып, алай бу шартла окъутууну качествосун тюшюрмезге керекдиле, деп белгилегенди.
Ирина Шонтукова КъМР-ни Жарыкъландырыу, илму эм жаш тёлюню министерствосу не мадарла этгенин билдиргенди. Ол санда окъуучулары аз болгъан тёрт школда «Точка роста» деген гуманитар арала къураргъа белгиленеди. Ол а мектеплени ырысхы мурдорларын игилендирирге, окъутуугъа шёндюгю амалланы сингдирирге, къошакъ билим бериу программаланы кенгертирге, узакъдан окъутууну кийирирге онг берликди.
«Билим бериу» миллет программаны «Хар сабийни да жетишимлери» федерал проектини чеклеринде уа Ташлы-Талада, Огъары Лескенде эмда Ероккода къошакъ билим бериу программа кенгертилип, сабийлени фахмуларын ёсдюрюрге, шахматла бла кюреширге онгла къуралгъандыла.
Былтыр РФ-ни «Билим бериуню айнытыу» къырал программасына кёре бёлюннген ахчагъа алты мектепде спорт залла жангыртылгъандыла, оборудование келтирилгенди. Быйыл а тапландырыу иш энтта ючюсюнде бардырыллыкъды.
-Алай бла министерство къолундан келгенни аямайды, билим бериуню шёндюгю амалларын кийириу жаны бла уллу иш бардырылады,-дегенди докладчы сёзюню ахырында.
Жыйылыуда Прохладна районну администрациясында билим бериу управленияны башчысы Татьяна Золка да сёлешгенди. Ол школлагъа уллу борчла салыннганларын чертгенди: къайда окъугъанларына да къарамай, сабийле тийишли билим алып, бир къырал экзаменни жетишимли берирча этерге кереклисин айтханды.
КъМР-ни Парламентини депутаты медицина колледжни башчысы Светлана Пшибиева бла педагогика колледжни директору Фатимат Ашабокова аз санлы школлада окъугъан сабийлени, аланы ата-аналарын бла устазланы къонакъгъа чакъыргъандыла. Алай бла алада окъутуу къалай къуралгъанын кёрюп, келир кезиуде аланы сайларла деп ышаннгандыла.
Ахырында Нина Емузова сёлешгенле кемчиликлени ачыкъларгъа болушханларын белгилеп, аланы кетериуню мадарларын хазырларгъа кереклисин айтханды.
