Тюнене Нальчик шахарны жер-жерли администрациясыны аллында КъМР-ни халкъ поэти, Социалист Урунууну Жигити Алим Кешоковну хурметине бушуулу митинг бардырылгъанды. Ол жашаудан кетгенли быйыл 19 жыл болады. Тюбешиуге аслам адам жыйылгъанды, аланы араларында къырал къуллукъчула, маданиятны келечилери эмда поэзиягъа табыннганла болгъандыла.
КъМР-ни Маданият министрни къуллугъун толтургъан Мухадин Кумахов митингни ача, поэтни чыгъармачылыгъына эс бургъанды. Хар жылдан адамла аны туугъан кюнюн бла ёлген кюнюн эсгергенлери, аны эсгертмесини къатында жамауат жыйылгъаны халкъны поэтге сюймеклигин кёргюзтген шартла болгъанын энчи чертгенди. Дагъыда ол поэтни философиясы бизни туугъан жерибизни, адамланы, табийгъатны сюерге, жюрек жылыулукъ берирге юйретгенини юсюнден да айтханды.
Ызы бла КъМР-ни Жазыучуларыны союзуну правленини председатели Беппайланы Муталипге сёз берилгенди. Ол поэтни ёлюмсюз аты ёмюрден ёмюрге кёче барлыгъын, чыгъармачылыгъы хар тёлюге да юлгю боллугъуну юсюнден айтып, Кешоковну назмусун малкъар тилге кёчюрюп окъугъанды. КъМР-ни Жазыучуларыны союзуну правленини члени Мария Котлярова аны Уллу Ата журт урушда жигитлигини, Къулийланы Къайсын бла шуёхлугъуну юслеринден хапарлагъанды.
РФ-ни Къырал Думасыны Федерал Жыйылыууну депутаты Ирина Марьяш Къулийланы Къайсынны бла Алим Кешоковну урушдан аскер хроникалары табылгъанын билдиргенди эмда жууукъ заманны ичинде аланы бирлешдирип, сурат жыйымдыкъ этип басмаларгъа оноуну юсюнден да айтханды.
-Эки жерлешибиз къазауатда бирге болгъандыла, экиси да жанларын аямай Ата журтубузну къоруулагъандыла. Белгилисича, Къайсын жаралы болгъанда, Алим аны жашауун сакълагъанды, кётюрюп, учхан окъланы тюбюнден чыгъаргъанды. Ол тюйюлмюдю баш магъана?!
Фронтдан къайтхандан сора да ала керти поэтле болалгъандыла. Назмуларында, кёрген къыйынлыкъларын ариу миллет тиллеринде айталгъандыла. Аланы чыгъармачылыкъларын не тилге кёчюрсенг да, магъанасы тюрленмейди – олду аланы энчи хунерлиликлери, - дегенди КъМР-ни Парламентини Председателини орунбасары Мурат Карданов. Ызы бла ол Алим Кешоковну назмусун кёлден айтханды.
Жыйылгъанланы санында Чегем районну келечилери да бар эдиле. Чегем муниципал районну башчысы Хасанш Одижев бизни республикадан дуниягъа белгили эки поэтибиз болгъанын, аланы нёгерлик жюрюте билгенлерин, чыгъармачылыкълары келлик тёлюлеге юлгюлей къаллыкъларын энчи белгилеп айтханды. Ызы бла ол Кешоковну урушда къаллай майдаллагъа бла саугъалагъа тийишли болгъанын санагъанды.
Алайда сабийле назмуладан юзюкле окъугъандыла. Мухадин Кумахов жазыучуну хурметлерге келгенлеге жюрек ыразылыгъын билдиргенди. Митинг эсгертмеге гюлле салыу бла бошалгъанды. Ызы бла жыйылгъанла поэтни ёз эли Шалушкагъа атланнгандыла.