КъМР-ни Парламентини 6-чы чакъырылыуунда Жамауат советни биринчи жыйылыуу бардырылгъанды. Анда къурау жумушла тинтилгендиле. Спикер Татьяна Егорова бу орган «РФ-де жамауат контрольну юсюнден» эм «КъМР-де жамауат контрольну юсюнден» законлагъа тийишлиликде жарашдырылгъанын билдиргенди.
-Ол Болумну излемлерине эмда анга кийирилген тюзетиулеге тийишлиликде къуралгъанды. Анга билимли, жамауатда атлары айтылгъан, хурметли, сынаулу, законла чыгъарыу, аланы толтуруу ишден ангылаулары болгъан адамла киргендиле,-деп Татьяна Борисовна советни келечилерин ишлеп башлагъанлары бла алгъышлагъанды. Ызы бла спикер законла чыгъарыучу органнга салыннган борчла, контроль-аналитика ишни энчиликлери, федерал законланы жарашдырыуну жашырынлыкълары бла къысха шагъырей этгенди.
Жамауат советни келечилери барысы да бирча къол кётюрюп, башчыларына Бечелланы Илиясны айыргъандыла. Ол а анга этилген ышаныулукъ ючюн ыразылыгъын айта, жамауат контрольну тамамлау жаны бла тири ишлерге, Парламентни бла граждан обществону институтларыны араларында байламлыкъланы кючлерге тюшеригин чертгенди.
Советни башчысыны орунбасарлары да сайланнгандыла ол кюн. Кандидатураланы сюзгенден сора бу къуллукъгъа Радий Жиругов бла Ольга Михайленко тийишли кёрюлгендиле.
Жыйылыуда башха соруулагъа да къаралгъанды.