Къыралны тюрлю-тюрлю жерлеринден Къабарты-Малкъаргъа РФ-ни ФСБ-сыны КъМР-де Чекчи управлениясына чакъырыу бла къуллукъ этерге келген жаш аскерчилени республикабыз бла танышыргъа онглары боллукъду. Тарыхчы, краевед Виктор Котляров кюч ведомствогъа саугъагъа республиканы юсюнден китапла бергенди. Аны юсюнден бизге кюч ведомствону пресс-службасындан билдиргендиле. 
Китапла   аскерчи жашауну женгиллетген бла бирге жаш адамлагъа къуллукъ этген регионну сюерге болушурукъдула. Аладан кёплери республикагъа биринчи кере келгендиле. Китаплада уа  мында жашагъан халкъланы тарыхларыны, миллет энчиликлерини, адетлерини бла тёрелерини юслеринден сейир шартла бардыла.  
– Ол себепден китапланы да темаларына кёре сайлагъанбыз. Хар чекчи бёлюмге 20-шар китап хазырлагъанбыз. Ол санда тарыхны, адет-тёрелени, Кавказгъа келген жолоучуланы эсгериулерини юслеринден: «В плену у горцев», «Джигиты и абреки», «Музей мировой истории», «Постижение Эльбруса», «Край гордой красоты», «Загадочная Кабардино-Балкария», «Необъяснимое. Непознанное. Невероятное» эм кёп башхала,-дегенди Виктор Котляров.
Ол саугъаланнган китапланы араларында республиканы жазыучуларыны чыгъармалары болгъанларын белгилегенди. «Аланы окъурукъ жашла Къабарты-Малкъар Аллах энчи сайлагъан жер болгъанын ангыларыкъдыла. Мен аны семиртип айтмайма», – деп къошханды.
Чекчилеге саугъаланнган китапланы араларында Виктор Котляров юй бийчеси Мария бла бирге жазгъан чыгъармала бла бирге  Кавказны тинтиучюлерини жыйымдыкълары да бардыла. Ол санда   Константин  Чхеидзени «Страна Прометея» эм «Крылья над бездной» китаплары.
РФ-ни ФСБ-сыны Чекчи управлениясында жаш аскерчилени Ата журтха сюймекликге юйретиу, билимлерин ёсдюрюу жумушлагъа энчи эс бурулады. Къуллукъ этген регионну тарыхы, жашауу бла шагъырейлениу бу ишни магъаналы кесегиди. 
 Энди уа Чекчи управленияда чакъырыу бла къуллукъ этгенлеге китапхана къуралгъанды. Къыралыбызны сакълай, жаш адамла ала тарыхы ёмюрлени теренине кетген, деменгили Элбрус бла мында жашагъан халкъланы тёрелери, оюмлулукълары бла энчи жерни къоруулагъанларына тюшюнюрюкдюле. Ким биледи, аланы окъуп, бюгюн чакъырыу бла къуллукъ этгенле тамбла Ата журтну къоруулаучуларыны батыр тёрелерин андан ары бардыра, келишимге къол салып, Кавказны сакълаучулары болур эселе уа.