Республиканы Спорт министерствосунда спортчуларыбызны Россейни грэпплингден бла грэпплингни «ги» тюрлюсюнден чемпионатында бла биринчилигинде болдургъан жетишимлерин сюзгендиле. Анга аталып, гёжефлени эмда аланы тренерлерини къатышыулары бла бардырылгъан жыйылыуну КъМР-ни спорт министрини орунбасары Заур Хежев бардыргъанды. 
Эсигизге салайыкъ, чемпионатха къыралны башха-башха регионларындан юч жюз чакълы  гёжеф къатышхандыла, Къабарты-Малкъарны келечилери анда эки майдал къытхандыла: 100 килограммгъа дери ауурлукъда Мухамед Урусов хорлагъанды, 62 килограммгъа дери ауурлукъда уа  Хасанби Балов доммакъ майдал къоллу болгъанды.
Биринчиликде уа бизни республикадан 14 жаш спортчу сынашхандыла, аладан «ги» бёлюмде «алтынны», «но гиде» уа «кюмюшню» Таламир Джандаров алгъанды. Аллай кёрюмдюлени дагъыда Кира Колечкина кёргюзтгенди. Саугъалы жерлеге Аппайланы Амир, Джамал бла Амир Шурдумовла эм Алим Кодзов  чыкъгъандыла. 
Мухамед Урусов энди дунияны чемпионатына барлыкъды. «Мени хорламларым жарау этип башлагъан спортчулагъа кёл этдирирле деп  ышанама. Ахшы юлгю кёргюзте, ала менден да уллу жетишимлеге итинирча этерге сюеме. Спорт бла кюрешип тебиреген кезиуюмю эмда бусагъатдагъы заманны тенглешдиргенде, ахшы тюрлениуле уа бардыла. Жаш спортчула бизге жете келедиле. Ала къыралыбыздан эм кючлю гёжефле бла бирге чыкъгъанлары уа, айхай да, къууандырады», - дегенди ол.
Жыйылыуда спортчуларыбыз эришиулени кезиулеринде этген жангылычла да сюзюлюп, жууукъ заманда къаллай ишле толтуруллукъларыны юсюнден да айтылгъанды. Грепплингден федерацияны таматасы Руслан Шухостанов белгилегенича, бюгюнлюкде республикабызда спортну бу тюрлюсюне сейир уллуду, бютюнда жаш адамланы араларында. 
Ахырында Заур Хежев спортчулагъа жангы хорламла, дунияны чемпионатында, дунияны бла Россейни кубокларында да кеслерин тийишлисича кёргюзтюрлерин тежегенди.

Кульчаланы Зульфия.