Бу кюнледе Къабарты-Малкъар къырал аграр университетде ётген жыйылыуда «Фермерни школу. Эл  мюлкге оноу этиу» проектни эсеплерин чыгъаргъандыла. Ол Россельхозбанк бла бирге бардырылгъанды, кесине да республиканы Эл мюлк министерствосу себеплик этгенди, деп билдиргендиле КъМКъАУ-дан.
Университетни башчысы Заурби Шхагапсоев белгилегенича, бу билим бериу проектге 117 адам къатышханды. «Аланы ичинде СВО-ну ветеранлары да болгъанлары бла энчи ёхтемленеме. Бюгюн выпускникледен оналтысы аладыла. Бу ишни сайлагъаныгъыз  ючюн ыспас этебиз. Сиз мында алгъан билим кючлю, тынгылы мюлклени мурдорун салыргъа себеплик этеригине ышанабыз», - дегенди ол.
Школну тауусханлагъа алгъыш сёзлерин эл мюлк эмда экономиканы айнытыу министрлени орунбасарлары Тимур Вадахов бла Ольга Белецкая, КъМР-де УФАС-ны таматасы Анна Кумахова, Россельхозбанкны, «Ата журтну къоруулаучулары» фондну регионда бёлюмюню келечилери да айтхандыла.
Бу проектни чеклеринде «Этли  эмда сютлю  малчылыкъ», «Терек бахчачылыкъ» жаны бла  билим берилген эди. Школну тауусханланы санында энди ишлеп башлагъанла  бла бирге аграр бизнесде сынамлары болгъанла да бар эдиле. Ала да, устазларына ыспас этип,  берген билимлери хайырлы боллукъларын  чертгендиле.

Муратланы О.