Къабарты-Малкъар къырал университетни  Минги тау тийресинде окъуу-илму комплексинде «Университет сменала – 2026» ат бла  Битеуроссей проект энди тёртюнчю кере бардырылады. Ары бу жол Луганск Халкъ Республикадан 144 школчу келгенди. 
Проектни къурагъанла уа РФ-ни Бийик билим бериу эмда илму министерствосу, «Биринчилени  къымылдаулары» эмда къонакъбай окъуу юйдюле. Аны кезиуюнде сабийлени усталыкъланы сайларгъа, университетде болумну ангыларгъа юйретедиле.
Он кюнню ичинде жаш тёлю, тири халда солугъаны бла бирге, окъуу интенсивлеге да къатышырыкъды. Алагъа тренингле, мастер-классла, спорт эришиуле, экскурсияла эмда чыгъармачылыкъ ингирле къураллыкъдыла. Программаны энчи кесеги уа Кавказны маданиятына аталады: къонакъ сабийле вузну миллет араларына да барып, алада  малкъарлыланы, оруслуланы бла  къабартылыланы адет-тёрелери бла  шагъырейленирикдиле. Андан сора да, ала канат жол бла Минги тауда «Гара-Башы» станциягъа чыгъарыкъдыла эмда Адыл-Суугъа барлыкъдыла.
Бери келгенлерини эмда мында кёргенлерини юслеринден ЛНР-ден сабийле кеслерини сезимлерин билдиргендиле. Сёз ючюн, Анастасия Смирнова былай дегенди: «Мен артыкъ уллу сейирим бла келмеген эдим. Мында уа аламат ашы-суу да болгъан, хар неси да тап къуралгъан саулукъландырыу арагъа  тюшюп къалгъанма. Хар кюн – ол жангы дерсди: лекцияладан башлап, квестлеге дери бардырыладыла. Бизни къауумубуз а хар нени да биригиулюкде этебиз, кураторларыбыз а чынтты профессионалладыла».
Владислав Гончаров а: «Мында табийгъатны тамашалыгъындан – деменгили къаяладан, тау сууладан – кёз алалмайма. Бизни лагерибиз сейирлик нарат агъачны ичинде орналгъанды. Вожатыйлерибизге бла бу проектни къурагъанлагъа ыразылыгъымы билдиреме. Ала эришиуле, викторинала да къурайдыла, аны ючюн а бизге эригирге заман болмайды»,-дегенди.
- Сейир лекцияланы ариу жерлеге жолоучулукъларыбыз  алыша, кюнле терк озуп барадыла. Ма быллай болумлада жаратылгъан сунама закий оюмла бла сагъышла,-дегенди Анастасия Калимханова.
Юрий Кутовой да билдиргенди кесини кёз къарамын проектни юсюнден: «Мени, Къабарты-Малкъарны тамаша табийгъаты бла бирге, сменада билим бериуню къалай къуралгъаны да эсими бийлейди. Хар кюнден да  биз жангы затланы кёрген, билген да этебиз – регионну тарыхындан башлап ол неда бу ишде билирге керекли жумушлагъа дери да. Мында ахшы сынам жыйышдыргъанма деп айталлыкъма, бу кюнлени унутурча тюйюлдю, аллай амалы болгъан хар кимге да бери келмей къалмагъыз, деп айтыргъа сюеме»,-дегенди.
Быйыл ноябрьге дери КъМКъУ-ну окъуу-илму комплексинде «Университет сменаланы» онбир кере къураргъа белгиленнгенди. Мында РФ-ни жангы субъектлеринден 1650 школчу эмда бирси жерледен «Биринчилени  къымылдауларыны» сайлау халлы эришиулеринде хорлагъан сабийле солурукъдула.