Бу кюнледе Тырныаууз шахарны Къулийланы Къайсын атлы маданият къаласында халкъгъа эрттеден да белгили болгъан «Орайда» телепроектни 25-жыллыгъына аталгъан кезиулю концерт ётгенди. 

– Ол жарыкъ халда «Минги тау» жырны макъамы бла халкъны ёхтемликге чакъыра башланнган эди. Концертни Бийланы Аслан, халкъны кёлюн кётюре, чынтты устача бардыргъанды. 
Концерт программа тынгылы къуралгъанын да белгилерчады. Халкъ билген жырладан сора да, жангы жырланы да артистле хазырлагъандыла. Аланы араларында атлары айтылгъанла, сахнада биринчи атламла этгенле да бар эдиле. Жыйылгъан жамауат, сахнагъа чыкъгъанла да бир тылпыу бла солугъанча кёрюне эди.  
Биринчи сахнагъа Жеттеланы Камилла «Таулу халкъым» деген жыр бла чыкъгъанды. Аны ызындан Тербулатланы Рамазан «Аманатды жазыугъа» эм «Сен ариугъа» жырланы жырлап, келгенлеге ариу сезимле жайгъанды.  Ызындан жырчыла Заммаланы Лейла, Жуболаны Жамболат, Лилу (Шаулухланы Лилия), Аппайланы Ислам, Апполаны Альберт, Тёппеланы Алим эм «Тау Адет» тепсеу къауум да бар эдиле. 
Концертде жангы жырланы юслеринден айтсакъ, Заммаланы Лейла «Горцы» жыр бла къууандыргъанды. Ызы бла Асанланы Кулина, Апполаны Альберт бла бирге сахнагъа чыгъып, «О, сюймеклик» деген жыр бла къууандыргъандыла.  
Жаш жырчы Нурлан Джамалдинов а къумукъ тилде ариу жырлагъанды. Дагъыда Алийланы Къурман бла бирге «Къайда мени сюйгеним» деген жырны айтханды. Ючюнчюсю уа, кёбюсю бек жаратхан «Ариуса сен» деген жыр, келген тиширыуланы жюреклерин эритгенди.
Ахырында белгили жырчы Тёппеланы Алим жырлагъанды. Халкъ анга къызыу къарсла бла ыразылыгъын билдиргенды. Ызы бла битеу жырчыла, сахнагъа чыгъып, бирге «Минги тау» жырны жырлагъандыла. Аны бла концерт толкъун къарсла бла бошалгъанды.
Бу къууанчда бирлик, тенглик, келишиулюк, жарашыулукъ да бийлик эте эдиле. Концерт бошалгъандан сора да, адамла, оюмларын, бюсюреулерин бир бирге айта, иги кесек заманны жайылыргъа сюймей тургъан эдиле. Ол а аны хазырлагъанла ишлерин тынгылы, бийик даражада тамамлагъанларын кёргюзтген шартды. 
Концерт башланырны аллында биз бу проектни автору, композитор эм журналист Асанланы Кулина бла къысха ушакъ этгенбиз. Ол былай айтханды:
- Бу проектни телевиденияны малкъар тилде музыка фондун байыкъдырыр, айнытыр мурат бла башлагъан эдим. Дагъыда белгили жырчыларыбызны бла фахмулу жаш адамларыбызны бир сахнада хунерлерин ачыкълар эм ёсдюрюр умутубуз бар эди. Бюгюнча эсимдеди биринчи концерт программабызны 2000 жылда декабрьде Жангы жылгъа жоралап къурагъаныбыз. Ол эфирге 2001 жылда чыкъгъаны себепли быйыл 25 жыл толгъаннга саналады. Андан бери кёп жырчыла, тепсеучюле, къобузчула, артистле да къатышхандыла проектге. Кёпле биринчи кере сахнагъа да анда чыкъгъандыла.  
Республикабызны башха миллетлерини келечилерин да къошуп тургъанма концертлерибизге. Коллегаларым, Къабарты-Малкъарны къырал телевидениясында ишлегенле, хар заманда да къатымда болгъандыла. Ала концертни алдырып, тап къурап, эфирге бергенден сора да, фондда сакълап тургъандыла. Барысына да жюрегимден ыразыма. Ала  билеклик этгендиле, фахмулары, хунерлери, энчи хатлары бла башламчылыгъыма тылпыу салгъандыла.
Проектни жангыдан къолгъа алгъанма. Бюгюннгю ишни аягъы юсюне салыргъа жырчы Бийланы Аслан бла къууанчланы къураучу Руслан Кешоков болушхандыла. Дагъыда Элбрус районну администрациясыны Маданият управлениясыны башчысы Толгъурланы Жаннетге бу концертни къураргъа болушханы ючюн ыразылыгъымы билдиреме.
Сау болсунла тынгылы билеклик этгенлери ючюн. Бу ингирде жыйылгъан къараучуланы бюсюреу сёзлерин, толкъун къарсларын мындан ары да эшитирбиз деп ышанама.

Додуланы Мадина.