Аушигерде Совет Союзну заманында ишленнген бир атлы пансионат иги да тозурагъанды. Болсада келир эки жылда ол жангыртылып, бюгюннгю излемлеге келиширча этилликди, деп билдириледи Черек муниципал районну администрациясыны пресс-службасындан.
Жангы тёрт этажлы мекямда эки жюз чакълы люкс номер къураллыкъды. Аланы хар бирини энчи бассейнчиклери эм ашханалары да боллукъду. Эски юйню жанына дагъыда эки этажлы корпус къошуллукъду. Анда медицина кабинетле, стоматология, аптека, ариулукъ салон, тренажерлары бла спорт зал, конференцияла ётдюрген ара эм ресторан орналлыкъды.
Комплекс бите баргъаны бла аны тийреси да айбатланырыкъды. Ол санда арбазында жылы суулары бла бассейнле, гитче футболгъа эм сабийле ойнарча майданла да ишлернирикдиле. Пансионатны таматасы Залим Черкесов айтханнга кёре, «Аушигер- Сити» комплексде элли адам урунурукъду.
Эсге сала айтсакъ, Аушигерни жылы суулары1250 метрден жер тюбюнден чыгъадыла, иссиликлери уа жайда, къышда да 50 градусха жетеди. Ала терилери, нервалары, санлары, къан тамырлары, аш орунлары, чегилери эмда башха затлары къыйнагъан саусузлагъа аламат болушадыла. Аланы дарманлыкълары Россейде кенг белгилиди. Ол себепден бери кеслерине бакъдырыргъа келгенлени санына жыл сайын къошула барады.