КъМР-ни Башчысы Казбек Коков Эверестге эки кере чыкъгъан эмда битеу дунияда эм къыйын ызлада тёппелеге ёрлеген аты айтылгъан альпинистка Карина Мезова бла тюбешгенди. Ала альпинизмни бла къаялагъа ёрлеуню айнытыу сорууланы сюзгендиле. Аны юсюнден КъМР-ни Башчысыны бла Правительствосуну пресс-службасындан билдиредиле.
Алай бла жайны ахырына дери Минги тауну тийресинде 3800 метр бийикликде «Шахарчыкъ» модуль комплексни ачылыуу боллукъду. Спортчула чыранда солургъа, ауузланыргъа боллукъдула эмда ёрлеулеге хазырланаллыкъдыла. Басхан ауузунда быйыл битеу да бирге 169 къая маршрут жарашдырылгъанды.
Альплагерьлени ызы да айныйды. Быйыл айтхылы «Шхельдагъа» 80 жыл толады, ол къыралны эм эрттегили альпинист базаларындан бириди, анда ол жылланы ичинде 20 мингден артыкъ спортчу хазырланнганды. Лагерь тири жангыртылынады, анда окъутуу сменала бла жыйылыула ётедиле. Августда тёппелеге чыгъыула бла бирге юбилей жумушла боллукъдула. Дагъыда республикада «Джантуугъан», «Бызынгы», «Адыл-Суу» альпинист лагерьле ишлейдиле, аланы хар бирини кесини школасы эмда маршрутлары барды. «Шхельдагъа» бла «Джантуугъаннга» элтген жоллагъа ремонт этилинеди, алай бла таулагъа женгилирек жетерге онг боллукъду.
Орус география обществону «Альтаир» жаш тёлю клубу эмда «Созидание» жамауат организация хазырлагъан «Туризм БЕЗопасности» проект быйыл президент грант алгъанды. Жай-кюз кезиуде сабийлени бла жаш адамланы туризмни, альпинизмни эм къаялагъа ёрлеуню мурдорларына, къыйын болумлада кеслерин жюрютюрге юйретирикдиле. Дерслени ишлеп тургъан къутхарыучула бла устала бардырлыкъдыла. Проект КъМР-ни Минкурортуну бла РГО-ну регион бёлюмюню себепликлери бла бардырылады.
«Бизни борчубуз хар инсан, аны хазырлыкъ даражасына да къарамагъанлай, Къабарты-Малкъарда кесини къарыууна кёре маршрутну табарча этиудю. Аны ючюн а регионнга эм кючлю спортчуланы келирге кёллендирген уллу эришиулени бардыргъанлай турлукъбуз», – деп чертгенди Казбек Коков.
Эсигизге салайыкъ, июньда республикада «Россейни къаялары» фестиваль жетишимли озгъанды, анга 47 региондан 600-ден артыкъ адам къатышханды. 2027 жылда фестиваль биягъы Минги тауну тийресинде озарыкъды. Карина Мезова фестивальны къураучуларындан аны бардырылыууна себеплик этгени ючюн регионну Башчысына ыразылыгъын билдиргенди.
Аны бла бирге республикада инфраструктураны айнытыргъа, жангы трассаланы къураргъа эмда хазырланыу программаланы сингдирирге мурат этилинеди.
Казбек Коков бла Карина Мезова Нальчикде къаялагъа ёрлеу шёндюгюлю араны къурар онгну да сюзгендиле.
«Къабарты-Малкъар, тарыхда болгъаныча, россей альпинизмни ата журтуна саналады – мында ишленнгендиле биринчи альпинист лагерьле, ёрлеулени тёрелери жаратылгъандыла, мында ишлегендиле атлары айтылгъан спортчула бла тренерле. Быллай араны къурау айтхылыкъ тарыхны андан ары барыуу боллукъду эмда жаш тёлюню кёллендирип, республиканы ол даражасын да кючлеп, спортну айныууна жангы себеплик этерикди», – дегенди регионну Башчысы.
Казбек Коков бу ишге тири къатышып тургъаны эмда Къабарты-Малкъарны спортуну тау тюрлюлерини белгили этиуге энчи къошумчулугъу ючюн Карина Мезовагъа ыразылыгъын билдиргенди.
